દરેક મોબાઈલ ફોનમાં એક યુનિક IMEI નંબર હોય છે, પરંતુ મેરઠમાં એવી વાત સામે આવી છે કે એક જ IMEI નંબર પર 13000થી વધુ ફોન સક્રિય છે. મેરઠ ઝોનના ADG રાજીવ સબરવાલ કહે છે કે આ મામલે કેસ નોંધવામાં આવ્યો છે અને તપાસ શરૂ કરવામાં આવી છે.
ADG રાજીવ સબરવાલે કહ્યું કે 13000થી વધુ ફોનમાં એક જ IMEI નંબર મળ્યો હતો. ADGના કહેવા પ્રમાણે ઝોન ઓફિસના વિભાગના અધિકારી દ્વારા આ માહિતી મળી છે. એવું કહેવામાં આવે છે કે વિભાગના અધિકારીએ પોતાનો ફોન રિપેર કરાવ્યો હતો. રિપેર કર્યા બાદ તેમના ફોનનો IMEI નંબર બદલાઈ ગયો હતો.
પહેલા તો ઝોન ઓફિસમાં જ સાયબર સેલમાં આ IMEI નંબરની તપાસ કરવામાં આવી હતી. આ તપાસમાં બહાર આવ્યું છે કે એક IMEI નંબર પર હજારો ફોન સક્રિય છે. બાદમાં જ્યારે જિલ્લાના સાયબર સેલમાં આ IMEI નંબરની તપાસ કરવામાં આવી ત્યારે એક IMEI નંબર પર હજારો ફોન સક્રિય હોવાનું પણ બહાર આવ્યું હતું.
ADGએ જણાવ્યું કે સાયબર સેલની તપાસ કર્યા બાદ મેરઠના મેડિકલ સ્ટેશનમાં કેસ નોંધવામાં આવ્યો છે. તેમણે કહ્યું કે આ મામલે સઘન તપાસ કરવામાં આવશે. જો આ એક ટેકનિકલ ભૂલ છે તો તેની પણ તપાસ કરવામાં આવશે અને જો કોઈ બીજો કેસ હશે તો કડક કાર્યવાહી કરવામાં આવશે. ADGએ કહ્યું કે IMEI નંબર કોઈપણ મોબાઇલ ફોનનો મહત્વપૂર્ણ ભાગ છે અને એક કરતા વધારે ફોનમાં એકસરખા IMEI નંબર હોય એ શક્ય નથી. આ એક ચિંતાનો વિષય છે. આ મોબાઇલ એક ચાઇનીઝ કંપનીનો હોવાનું જાણવા મળ્યું છે.