સુરત / ભયજનક સપાટી નજીક જળસ્તર પહોંચતા ઉકાઈ ડેમના 13 દરવાજા ખોલાયા, 10 ગામ થયા સંપર્ક વિહોણા

• ઉકાઈ ડેમની જળ સપાટીમાં વધારો
• ઉકાઈ ડેમની જળ સપાટી 342.28 ફૂટે પહોંચી
• પાણીની આવક વધતાં ડેમના 13 દરવાજા ખોલી છોડાયું પાણી

ચાલુ સાલ ગુજરાતમાં સર્વત્રીક વરસાદને લઇને દક્ષિણ ગુજરાતના જળાશયોમાં જળપ્રવાહમાં વધારો થયો છે. જેને લઇને ખેડૂતો તથા વહીવટીતંત્રને હાશકારો થયો છે. ત્યારે સુરતમાં પુરતા વરસાદને લઇને સુરત જિલ્લાના ઉકાઈ ડેમની જળ સપાટીમાં પણ વધારો નોંધાયો છે. હાલ  ઉકાઈ ડેમની જળ સપાટી 342.28 ફૂટે પહોંચી છે. જયારે ડેમની ભયજનક સપાટી 345 ફૂટ ગણવામાં આવી રહી છે. ઉકાઈ ડેમની ભયજનક સપાટીથી પાણી માત્ર બે ફૂટ જેટલું જ દૂર હોવાથી વહીવટી તંત્ર પણ સાબદું બન્યું છે અને ચાપતી નજર રાખી રહ્યું છે તથા ડેમમાંથી પાણી છોડવા નિર્ણય કરવામાં આવ્યો છે.

પાણી છોડતા હરિપુરા કોઝ-વે પાણીમાં ગરકાવ
તાજેતરમાં ઉપરવાસમાં ભારે વરસાદને લઇને ઉકાઇ ડેમમાં નવા નીરની આવક થઇ છે. હાલ ઉકાઈ ડેમમાં 1 લાખ 42 હજાર 233 ક્યુસેક પાણીની આવક થઇ હોવાનું સત્તાવાર રીતે જાહેર થવા પામ્યું છે. બીજી તરફ પાણીની આવક વધતાં ડેમના 13 દરવાજા ખોલી પાણી છોડવામાં આવ્યું છે. કિનારાના નીંચાણવાળા વિસ્તારોના ગામોને એલર્ટ કરી પાણી છોડવામાં આવતા તાપી નદીની જળ સપાટીમાં વધારો થતાં બારડોલી તાલુકાના કડોદ નજીક તાપી નદી ઉપર આવેલ હરિપુરા કોઝવે ફરી એકવાર પાણીમાં ગરક થયો હતો. 

10થી વધુ ગામો થયા સંપર્ક વિહોણા
પાણીના પ્રવાહને લઇને કોઝવે બંધ કરી દેવામાં આવ્યો હતો. આથી કોસાડી, ઉન, ખંજરોલી, ઉમરસાડી, ગવાછી, ગોદાવાડી, ખરોલી સહિતના 10 ગામો સંપર્ક વિહોણા બન્યા હતા. જેમાં ખાસ દરરોજ આવાગમન કરતાં લોકો મુશ્કેલીમાં મુકાયા હતા. વધુમાં લોકો સમય અને નાણાનો વ્યય કરી લાખ ચોર્યાસીનો ફેરો ફરી પોતાના ઘરે અને ઓફિસ પહોંચવા મજબૂર બન્યા હતા.