દુષ્કર્મ / સુરતમાં 12 વર્ષની સગીરા પર ભાઈના સગાએ આચર્યું દુષ્કર્મ, ચાર માસનો ગર્ભ હોવાનું આવ્યું સામે

• સુરતમાં 12 વર્ષની સગીરા સાથે દુષ્કર્મ 
• સગીરાને ચાર માસનો ગર્ભ હોવાનું આવ્યું સામે 
• સગીરાના ભાઈના કાકાસસરાએ આચર્યું દુષ્કર્મ

સુરતમાં વધતી જતી ગુનાખોરી હવે સમાજ માટે એક ચિંતાનો વિષય બન્યો છે. હત્યા અને દુષ્કર્મ જેવા બનાવો તો જાણે કે અહીયા સામાન્ય થઈ ગયા છે. તેમા પણ ખાસ કરીને અહીયા બાળકીઓ સાથે દુષ્કર્મના બનાવો વધી રહ્યા છે. ત્યારે વધુમાં ફરી એક 12 વર્ષની સગીરા સાથે દુષ્કર્મનો બનાવ સામે આવ્યો છે. 

સગીરાને ગર્ભ રહી જતા મામલો સામે આવ્યો 

સાંભળીને આપને નવાઈ લાગશે કે સગીરાના ભાઈના કાકા સસરાએ સગીરા સાથે દુષ્કર્મ આચર્યું હતું. જેના કારણે સગીરાને ગર્ભ રહી ગયો ત્યારે આ સમગ્ર મામલો સામે આવ્યો. આ બનાવને કારણે લોકોમાં રોષનો માહોલ ફેલાયેલો છે. સાથેજ બાળકીઓની સુરક્ષાને લઈને પણ અહીયા હવે ઘણા સવાલો ઉઠી રહ્યા છે. 

મેડિકલ તપાસમાં 4 માસનો ગર્ભ હોવાનું સામે આવ્યું 

સગીરાની જ્યારે મેડિકલ તપાસ કરવામાં આવી ત્યારે સામે આવ્યું કે સગીરાને 4 માસનો ગર્ભ હતો. જેથી આ મામલે પરિવારે સગીરા સાથે વાત કરી વાત કરી ત્યારે તેણે કહ્યું આરોપી કોણ છે કે જેણે તેને હવસની શિકાર બનાવી હતી. પરિવારે તુરંત પોલીસમાં ફરિયાદ નોંધાવી હતી. જેથી પોલીસે સમગ્ર મામલે કાયદેસરની કાર્યવાહી આરંભી છે. 

રાજસ્થાનના બાંસવાડામાં સગીરા સાથે દુષ્કર્મ આચર્યું હતું 

આરોપીએ રાજસ્થાનના બાંસવાડામાં સગીરા સાથે દુષ્કર્મ આચર્યું હતું જેથી સિંગણપોર પોલીસે ગુનો દાખલ કરીને આ કેસને બાંસવાડામાં ટ્રાન્સફર કર્યો હતો. છેલ્લા બે દિવસથી બાળકીને સતત પેટમાં દુખાવો થઈ રહ્યો હતો. જેથી પરિવાર બાળકીની સારવાર કરવા તેને સિવિલ લઈ ગયા જ્યા સમગ્ર મામલો સામે આવ્યો હતો.