વેસ્ટર્ન ડિસ્ટર્બન્સની સાથે સર્જાયેલા અપરએર સાઈક્લોનિક સરક્યુલેશનથી રાજ્યનાં વિવિધ શહેરોમાં 25થી 37 કિ.મીની ઝડપે ફૂંકાયેલા પવનો સાથે ધૂળની ડમરી ઊડી હતી. ત્યારબાદ વિવિધ શહેરોમાં વરસાદી ઝાપટાં, હળવો વરસાદ તો ક્યાંક બરફનાં કરા પડતાં વાતાવરણમાં ઠંડક વધી હતી.
વેસ્ટર્ન ડિસ્ટર્બન્સને કારણે સોમવારે બપોર પછી ઝડપી પવન અને ધુળની ડમરીઓ બાદ સમગ્ર રાજ્યમાં ઠેર ઠેર વરસાદી ઝાપટા સાથે કરા પડ્યા હતા. જોકે હજુ અગામી 24 કલાક દરમિયાન ઉત્તર ગુજરાત, અમદાવાદ અને સૌરાષ્ટ્ર-કચ્છનાં સરહદી વિસ્તારોમાં કમોસમી વરસાદ પડવાની વકી હવામાન વિભાગે વ્યક્ત કરી છે.
તો 24 કલાકમાં વાતાવરણમાં આવેલા પલટાથી વહેલી સવારથી વાતાવરણમાં ઠંડક પ્રસરી છે. છેલ્લા 24 કલાકમાં રાજ્યના 12 જિલ્લાઓમાં વરસાદ નોંધાયો હતો. 38 તાલુકામાં ગાજવીજ સાથે વરસાદ નોંધાયો હતો. જ્યારે વાવાઝોડા અને વીજળીના કારણે રાજ્યમાં કુલ 11 લોકોના મોત થયા છે.
તમને જણાવી દઇએ, રાજ્યમાં અચાનક વાતાવરણના પલટાને કારણે ઠેર ઠેર કમોસમી વરસાદ થયો છે. લોકોને ગરમીથી રાહત તો મળી છે, પરંતું પાકને નુકસાન થવાના કારણે ખેડૂતોની ચિંતા વધી છે, તો દેશમાં આ વર્ષે ચોમાસું સામાન્ય રહેવાનું અનુમાન છે અને ચોમાસાના ચાર મહીના દરમિયાન સરેરાશ 96 ટકા વરસાદ થશે. હવામાન વિભાગે આજે આ વર્ષના દક્ષિણ-પશ્વિમ ચોમાસાનું પ્રથમ અનુમાન જાહેર કર્યું છે.