દુર્ઘટના / અમંગળવાર! ગોંડલ નજીક અકસ્માતમાં સુરતના પટેલ પરિવારના 5 સભ્યોના મોત, રાજ્યમાં 4 અકસ્માતમાં કુલ 11ના મોત

• રાજયમાં આજનો દિવસ અમંગળ રહ્યો!
• અલગ-અલગ અકસ્માતમાં 11 લોકોના મૃત્યુ
• ગોંડલમાં એક સાથે 5 લોકોના મૃત્યુ

મંગળવારે રાજ્યમાં 4 અકસ્માતની ઘટનામાં કુલ 11 લોકોના મોત થયા છે. રાજકોટના ગોંડલ પાસે કાર અને બસ વચ્ચે અકસ્માત થતા 5 લોકોના કમકમાટી ભર્યા મોત થયા છે. અરવલ્લી જિલ્લાના માલપુરના સોનિક પુર પાસે લગ્નપ્રસંગ પતાવી ઘરે જતા પરિવારને અકસ્માત નડતા 3 લોકોના મૃત્યુ થયા છે. તો ભૂજમાં સ્કૂલ બસ અને જીપ વચ્ચે અકસ્માત થતા 2 લોકોના મોત થયા છે. વડોદરાના ડભોઈ પાસે બે બાઈકો વચ્ચે અકસ્માત થતા એકનુ મોત થયુ છે. તેથી આજનો દિવસ મંગળવાર અમંગળ સાબિત થયો તેમ લાગી રહ્યું છે.

રાજકોટઃ કારનું ટાયર ફાટતા બેકાબૂ કાર ST બસ સાથે અથડાઈ, 5ના મોત

સુરતથી લગ્ન પ્રસંગે બગસરાના મુનજીયારસ ખાતે જઇ રહેલા પટેલ પરિવારને અકસ્માત નડ્યો હતો. રાજકોટ-બગસરા રોડ પર આ અકસ્માત સર્જાવાને કારણે અકસ્માત સર્જાયો હતો. રાજકોટમાં ગોંડલના બિલિયાળા પાસે કાર અને ST બસ વચ્ચે અકસ્માત થતા 5 લોકોના ઘટનાસ્થળે મૃત્યુ થયા છે. જ્યારે 2 ઇજાગ્રસ્તોને સારવાર માટે રાજકોટ ખસેડાયા છે. કાર રાજકોટથી ગોંડલ તરફ જતી હતી. કારનું ટાયર ફાટતા રોંગ સાઇડમાં કાર ચાલી ગઇ હતી. કારનું ટાયર ફાટતા બેકાબૂ કાર ST બસ સાથે અથડાતા દુર્ઘટના બની હતી.

અરવલ્લીઃ લગ્નપ્રસંગથી ઘરે જતા પરિવારને નડ્યો અકસ્માત, 3 લોકોના મૃત્યુ

અરવલ્લીના માલપુરના સોનિકપુર પાસે અકસ્માતમાં 3ના મૃત્યુ થયા છે. અકસ્માતમાં વધુ એક ઈજાગ્રસ્તનું સારવાર દરમિયાન મૃત્યુ થયું છે. લગ્નપ્રસંગ પતાવી પરત આવતા પરિવારને અકસ્માત નડ્યો હતો. રિક્ષા અને ડમ્પર વચ્ચે અકસ્માત થયો હતો.

ભુજઃ સ્કૂલ બસ અને બોલેરો જીપ વચ્ચે અકસ્માત, 2 લોકોના મૃત્યુ

ભુજના દેશલપર પાસે સ્કૂલ બસ અને બોલેરો જીપ વચ્ચે અકસ્માત સર્જાયો હતો. જેમાં બે વ્યકિતના ઘટનાસ્થળે મૃત્યુ થયા છે. સ્કૂલ બસમાં સવાર વિદ્યાર્થીઓનો આબાદ બચાવ થયો છે.

વડોદરાઃ બે મોટરસાઈકલ વચ્ચે અકસ્માત, 1 વ્યક્તિનું મૃત્યુ

વડોદરામાં ડભોઇના સોમપુરા ગામે બે મોટરસાઈકલ વચ્ચે અકસ્માત સર્જાયો હતો. એક યુવાન ગંભીર રીતે ઇજાગ્રસ્ત થયો છે, જ્યારે એકનું ઘટનાસ્થળે મૃત્યુ થયું છે. ઇજાગ્રસ્ત યુવાનને હોસ્પિટલ ખસેડાયો છે. આ બનાવને લઈને ચાંદોદ પોલીસ ઘટનાસ્થળે પહોંચીને તપાસ હાથ ધરી છે.