રોગચાળો / અમદાવાદ ડેન્ગીના ભરડામાં અઠવાડિયામાં 104 કેસ, મેલેરિયાના પણ 164 કેસ

અમદાવાદ શહેરમાં રોગચાળાએ માથુ ઉંચક્યુ છે. મચ્છરજન્ય અને પાણીજન્ય રોગોનું પ્રમાણ વધ્યુ છે. 1 સપ્ટેમ્બરથી 7 સપ્ટેમ્બર સુધીમાં મેલેરિયાના 164 કેસ નોંધાયા છે જ્યારે ડેન્ગીના 104 કેસ નોંધાયા હતા. અને ચીકનગુનીયાના 2 કેસ નોંધાયા છે. જ્યારે પાણીજન્ય રોગચાળામાં ઝાડા ઉલટીના 113, કમળાના 74, ટાઈફોઈડના 168 કેસ નોંધાયા છે. 

ઉપર જણાવેલા આકંડા સરકારી ચોપડે નોંધાયેલા છે જ્યારે એ સિવાયના ઘણા કેસ હશે. છેલ્લા અઠવાડિયામાં રોગચાળાએ માઝા મૂકી છે. તેમાંય ડેન્ગીએ અમદાવાદને વધુને વધુ ભીંસમાં લીધુ છે. દવાખાના દર્દીઓથી ઉભરાઈ રહ્યા છે. 

મનપાના હેલ્થ ડિપાર્ટમેન્ટ તરફથી 1લી જાન્યુઆરીથી 7 સપ્ટેમ્બર 2019 સુધીમાં 29,707 લોહીના નમુનાની તપાસ કરી છે. અને 367 સીરમ સેમ્પલ લેવામાં આવ્યા છે. આ અંગે અઠવાડિયામાં જ હેલ્થ વિભાગ 14,248 ક્લોરીનની ગોળીઓનું વિતરણ કરી ચુક્યુ છે. તેમ છતાં રોગચાળો રોકાવાનું નામ નથી લેતો. વળી વરસાદ પણ વિરમી વિરમીને વરસે છે જેથી રોગચાળો ધીરે ધીરે વધી રહ્યો છે.