ક્રાઈમ / 11 રૂપિયાના યંત્રની ખરીદી સામે 100ની બાજી, દર પંદર મિનિટે લકી ડ્રો, અમદાવાદમાં ધાર્મિક યંત્રો પર જુગાર ધમધમ્યો

યંત્રના જુગારમાં દર પંદર મિનિટે લકી ડ્રો થાય, જેમાં ૧૧ રૂપિયાની સામે ૧૦૦ રૂપિયા મળે છે. એલઇડીના સ્ક્રીન પર ૧૦ યંત્ર ઓનલાઈન દેખાતાં હતાં. દરેક યંત્રનો દર પંદર મિનિટે લકી ડ્રો થતો હતો, મોટા ભાગના લોકો એક વાર લાગશે તેમ સમજીને વારંવાર જુદા જુદા યંત્ર પર પૈસા લગાવતા હોય છે, જેમને યંત્ર લાગી જાય તેમને તેમણે લગાવેલા રૂપિયાના દસ ગણા રૂપિયા મળે છે. મુંબઇમાં બેઠેલા આકાઓ આ ધંધામાં ટેક્સ પણ ભરી રહ્યા છે. 
આ રીતે મળે છે ડ્રોની કૂપન 
• રૂ. ૧૧નું યંત્ર લો તો 
રૂ. ૧૦૦ની કૂપન 
• રૂ. ૧૧૧નું યંત્ર લો તો 
રૂ. ૧૦૦૦ની કૂપન 
• રૂ. ૧૧૦૦નું યંત્ર લો તો 
રૂ. ૧૦૦૦૦ની કૂપન 
• રૂ. ૧૧૦૦૦નું યંત્ર લો તો 
રૂ. ૧૦૦૦૦૦ની કૂપન
ઝડપથી રૂપિયા કમાવવા માટે લોકો હવે દેવી-દેવતાઓનાં ધાર્મિક યંત્રનો સહારો લેતા થઇ ગયા હોવાનો ચોંકાવનારો પર્દાફાશ થઇ રહ્યો છે. શહેરના કૃષ્ણનગર, સોલા સહિતના વિસ્તારોમાં ધાર્મિક યંત્રો પર જુગારધામ ચાલી રહ્યાં છે, જેના પર પોલીસ તેમજ સુરક્ષા એજન્સીઓ રેડ કરી રહી છે. ધાર્મિક યંત્રો પર જુગાર એકાદ-બે વર્ષથી નહીં, પરંતુ લગભગ ૧પ વર્ષથી ધમધમી રહ્યો છે, જેના પર હવે પોલીસે લાલ આંખ કરવાનું શરૂ કરી દીધું છે. સમગ્ર ઘટનામાં ચોંકાવનારી વાત એ છે કે ધાર્મિક યંત્રો પર જુગારનું એપી સેન્ટર મુંબઇમાં છે અને બાપુનગરનો માસ્ટર માઇન્ડ ગુજરાતની કમાન સંભાળી રહ્યો છે. પોલીસે યંત્ર પર જુગાર રમાડતી ટોળકીઓને ઝડપવાનું શરૂ કરી દીધું છે, જેમાં હવે આખું નેટવર્ક સંભાળતા આકાઓ ઉપર પર પણ સકંજો કસાશે. 
અમદાવાદ, રાજકોટ, વડોદરા, કચ્છ, સુરત સહિત રાજ્યનાં તમામ શહેરોમાં ઓનલાઇન યંત્ર સેલિંગ વેપારની આડમાં જુગારનો ધંધો ચાલી રહ્યો છે, જેમાં લોકો પોતાનાં કિસ્મત અજમાવી રહ્યાં છે. અમદાવાદ સહિત ગુજરાત પોલીસે ધાર્મિક યંત્રની આડમાં ચાલતા જુગાર પર દરોડા પાડવાનું શરૂ કરી દીધું છે અને જેમાં તેમને સફળતા પણ મળી રહી છે. ધાર્મિક યંત્ર પર જુગારમાં અમદાવાદના બાપુનગર વિસ્તારમાં રહેતી રાજુ નામની વ્યક્તિ ગુજરાતની કમાન સંભાળી રહી છે, જ્યારે તેનું એપી સેન્ટર મુંબઇ છે. ઝોન-૪ના ડીસીપી કાનન દેસાઇએ જણાવ્યું છે કે કૃષ્ણનગર વિસ્તારમાં ધાર્મિક યંત્રના જુગાર પર ચાલતા દરોડાના કેસમાં માસ્ટર માઇન્ડ સુધી પહોંચવામાં આવશે અને તેનું હબ મુંબઇ હોવાનું પણ સામે આવ્યું છે. સામાન્ય રીતે લોકો આ જુગાર માટે ભીડભાડવાળા બિલ્ડિંગમાં બેઝમેન્ટની જગ્યા પસંદ કરે છે, જ્યાં બેરોકટોક આ ધંધો ચાલી શકે.   

જુગારની ફ્રેન્ચાઇઝી લેનાર શખ્સને સાત હજાર રૂપિયા આપવાના હોય છે

રાજુ તેમજ તેના સાગરીતોએ મુંબઇના આકા પાસેથી ડિસ્ટ્રિબ્યૂટર‌િશપ લીધેલી છે, જેમાં જો કોઇ વ્યક્તિને યંત્ર પર જુગારનો ધંધો ચાલુ કરવો હોય તો પહેલાં ૩૦ હજાર રૂપિયા ડિપોઝીટ પેટે રાજુને આપવા પડે છે. ૩૦ હજાર રૂપિયા આવી ગયા બાદ રાજુ કમ્પ્યૂટર તેમજ ૧૦ હજારનું બેલેન્સ અને કૂપનો તેમજ યંત્રો આપે છે. દસ હજારના બેલેન્સની સામે જુગારની ફ્રેન્ચાઇઝી લેનાર શખ્સને સાત હજાર રૂપિયા આપવાના હોય છે, જેમાં તેને ૩૦ ટકા પ્રોફિટ મળે છે. 

કોઇ પણ નાણાકીય વ્યવહાર તમામ લોકો બેન્ક મારફતે કરે છે
આ વેપાર ઓનલાઇન ચાલે છે, જેમાં છેતરપિંડી થવાની શક્યતાઓ રહેલી છે. તમામ વેપાર એક સોફ્ટવેરના માધ્યમથી ચાલે છે. આ વેપારનું મૂળ હબ અંધેરીઆલમની નગરી મુંબઇ છે, જે આખા દેશમાં આ વેપાર ચલાવે છે. મુંબઇથી તમામ રાજ્યોને ફ્રેન્ચાઇઝી આપવામાં આવે છે અને ગુજરાતનો એક એજન્ટ નક્કી કરે છે તે એજન્ટ તમામ શહેરોમાં ફ્રેન્ચાઇઝી આપે છે ત્યારે શહેરમાં નિમાયેલા રિટેઈલ આઉટલેટ લોકોને ફ્રેન્ચાઇઝી આપે છે. કોઇ પણ નાણાકીય વ્યવહાર તમામ લોકો બેન્ક મારફતે કરે છે.
તમામ જગ્યાએ એક જ ડ્રો ખૂલે છે: મુંબઇથી ઓપરેટ થતા આ વેપારમાં એક જ સર્વરનો ઉપયોગ કરવામાં આવ્યો છે, જેથી આ વેપારમાં દર ૧૫ ‌મિનિટે ડ્રો ખૂલે છે, જેની ખાસિયત એ છે કે દેશમાં કોઇ પણ જગ્યાએ આ એકસરખો ડ્રો ખૂલે છે. ગુજરાતમાં અગર શ‌િન યંત્ર ખૂલે તો પછી મુંબઇમાં પણ શ‌િન યંત્ર ખૂલે છે, જેનાથી કોઇ પણ પ્રકારની ગ્રાહક સાથે છેતર‌િપંડી થતી નથી.