આદિવાસી સોફ્ટવેર એન્જિનિયર યુવતી સામૂહિક બળાત્કાર કેસમાં 40 કલાક બાદ પણ પોલીસ એક પણ ધરપકડ કરી શકી નથી
ઝારખંડમાં સોફ્ટવેર એન્જિનિયર યુવતી પર સામૂહિક બળાત્કાર
ઘટના બન્યાના 40 કલાક બાદ પણ પોલીસ ખાલીહાથ
હેમંત સરકારના કાર્યકાળમાં બળાત્કારના 5000થી વધુ કેસ નોંધાયા: BJP
ઝારખંડના ચાઈબાસામાં એક આદિવાસી સોફ્ટવેર એન્જિનિયર યુવતી પર 10 યુવકોએ સામૂહિક બળાત્કાર ગુજાર્યો હતો. આ કેસમાં પોલીસ એક પણ ધરપકડ કરી શકી નથી. જેને લઈને રાજ્યનું રાજકારણ ગરમાયું છે. મહત્વનું છે કે, ઘટનાને 40 કલાકથી વધુ સમય વીતી જવા છતાં પોલીસના હાથ ખાલી છે.
વિગતો મુજબ પીડિતા સોફ્ટવેર એન્જિનિયર છે અને ચાઈબાસામાં રહીને તેની કંપની માટે ઘરેથી કામ કરી રહી છે. આ ઘટના ગુરુવારે સાંજે 6 વાગ્યાની આસપાસ બની હતી. ચાઈબાસાના એક મિત્ર સાથે યુવતી સ્કૂટીમાં મુસાફરી કરવા ટેકરા હાતુ હવાઈ પટ્ટી પર ગઈ હતી. જ્યાં 8-10 યુવકો તેના મિત્રને ડરાવી ધમકાવીને પીડિતાને નિર્જન ઝાડીઓમાં લઈ ગયા હતા અને યુવતી પર સામૂહિક બળાત્કાર કર્યો હતો.
શું કહ્યું જિલ્લા પોલીસ અધિક્ષકે ?
રાત્રે જ્યારે પોલીસને આ અંગેની માહિતી મળી ત્યારે સદર સબ-ડિવિઝનલ પોલીસ ઓફિસર દિલીપ ખલકો અને મુફસીલ પોલીસ સ્ટેશનના પ્રભારી પવન પાઠક દળ દળ સાથે ઘટનાસ્થળે પહોંચ્યા અને આરોપીઓની શોધખોળ કરવામાં આવી છે. જિલ્લા પોલીસ અધિક્ષક આશુતોષ શેખરે જણાવ્યું છે કે કેટલાક યુવકોને શંકાના આધારે અટકાયતમાં લેવામાં આવ્યા છે, જેમની પૂછપરછ કરવામાં આવી રહી છે. 10 અજાણ્યા લોકો સામે કેસ નોંધવામાં આવ્યો છે.
શું કહ્યું ભારતીય જનતા પાર્ટીએ ?
આ તરફ બીજેપીના પ્રદેશ પ્રવક્તા પ્રતુલ શાહદેવે કહ્યું, ચાઈબાસાના હાઈ સિક્યોરિટી એરપોર્ટ વિસ્તારમાં સોફ્ટવેર એન્જિનિયર સાથે 10 લોકોના સામૂહિક બળાત્કારની ઘૃણાસ્પદ ઘટનાએ ફરી એકવાર દીકરીઓની સુરક્ષાના મુદ્દે ઝારખંડને શરમજનક બનાવી દીધું છે. હેમંત સરકારના કાર્યકાળ દરમિયાન બળાત્કારના 5000થી વધુ કેસ નોંધાયા છે, પરંતુ 1% કરતા ઓછા બળાત્કારીઓને ઝડપી ટ્રાયલ દ્વારા સજા આપવામાં આવી છે. આ સરકારના કાર્યકાળમાં દીકરીઓ સાવ અસુરક્ષિત બની ગઈ છે. સરકારે તાત્કાલિક બળાત્કારીઓની ધરપકડ કરવા માટે કડક પગલાં લેવા જોઈએ અને પીડિતાની સારવાર માટે જરૂરી તમામ પગલાં લેવા જોઈએ.
ઝારખંડ મુક્તિ મોરચાના પ્રવક્તાએ શું કહ્યું ?
ઝારખંડ મુક્તિ મોરચાના પ્રવક્તા તનુજ ખત્રીએ કહ્યું કે ભારતીય જનતા પાર્ટીએ મહિલાઓ અને દીકરીઓના મામલે રાજનીતિ ન કરવી જોઈએ. ઝારખંડ મુક્તિ મોરચાએ કહ્યું કે, આ ઝારખંડ છે. અહીં દીકરીઓ અને મહિલાઓ સાથેની ઘટના બાદ ઝડપી કાર્યવાહી કરવામાં આવે છે.