કોરોના સંક્રમણ / 10 ધોરણ નપાસ નકલી ડૉક્ટરને પકડવા પોલીસે 10 કિમી પીછો કરીને કરી ધરપકડ

• ઝારખંડના લોહરદગા કુડૂના ઉડુમુડ્ડૂ બારીડીહ ગામમાંથી ઝડપાયો નકલી ડૉક્ટર
• ધોરણ 10 નપાસ નકલી ડૉક્ટર બની લોકોના કરતો હતો ઈલાજ
• પોલીસ નાસી છૂટેલા ડૉક્ટરને પકડવા 10 કિમી સુધી પીછો કર્યો

ઝારખંડના લોહરદગામાં સ્થાનિક તંત્રની ટીમે એક 10 નપાસ નકલી ડૉક્ટરની ધરપકડ કરી છે. અને તેને જેલ હવાલે પણ કરી દેવાયો છે. કોરોના જેવા સમયમાં પણ દર્દીઓની જિંદગી સાથે રમત કરતા નકલી ડૉક્ટરનું ક્લિનિક બંધ કરી દેવાયું છે. લોહરદગા કુડૂના ઉડુમુડ્ડૂ બારીડીહ ગામમાં એક નકલી ડૉક્ટર લાંબા સમયથી પોતાની ભક્તિ ચલાવી રહ્યો હતો. આ ક્લિનિકમાંથી 2 ઓક્સિજન સિલિન્ડર, 6 બેડ અને મોટી સંખ્યામાં ઈન્જેક્શનનો જથ્થો પ્રાપ્ત થયો છે. સાથે કેટલીક સિરિંજ પણ કબજે કરી છે. અને જે લોકો સારવાર લઈ રહ્યા હતા. તેમને 108ની સુવિધા દ્વારા હોસ્પિટલમાં સારવાર માટે ખસેડવામાં આવ્યા છે. 

પૂછપરછમાં સામે આવ્યું કે, નકલી ડૉક્ટર 10 ચોપડી પણ નપાસ

તંત્રની ટીમે નકલી ડૉક્ટર મંસૂર અંસારીની પૂછપરછ કરતા સામે આવ્યું કે, તે 10 ધોરણમાં પણ નપાસ છે. અને જ્યારે તેને દવાનું પ્રિસ્ક્રિપન વાંચવા માટે આપ્યું તો, એ પણ વાંચી શક્યો નહોતો. નકલી ડૉક્ટરની ધરપકડ સાથે નકલી ક્લિનિકને પણ બંધ કરી દેવાયું છે. આ સાથે નકલી ડૉક્ટર વિરુદ્ધ ડ્રગ્સ ઈન્સ્પેક્ટર અમિત કુમારના નિવેદન પર કુડૂ મથકમાં કેસ પણ દાખલ કરાયો છે. 
એક વર્ષથી દર્દીઓની જિંદગી બગાડવાનું કામ ચાલતું હતું

કુડૂના બારીડીહ મિલ્લતનગર પાછળના વિસ્તારમાં આશરે એક વર્ષથી આ નકલી ડૉક્ટર ક્લિનિક ખોલીને ગોરખધંધો કરી રહ્યો હતો. અને અહીંયા અનેક દર્દીઓની મોતની સૂચના જિલ્લા તંત્રને મળતા અધિકારીઓની આંખ ઉઘડી હતી. 

પોલીસે પાછળ દોડીને અંતે કરી ધરપકડ

નકલી ડૉક્ટરને પોલીસ આવવાની જાણ થતા ક્લિનિક બહારથી બંધ કરી પોતાની કાર લઈને ભાગી રહ્યો હતો. પોલીસે પણ ક્લિનિક પરથી તપાસ કરતા તેની પાછળ 10 કિમી સુધી પીછો કર્યો હતો. અને ધરપકડ કરી હતી. જ્યારે જિલ્લા તંત્રના અધિકારીઓએ વધુ તપાસ કરી તો, ક્લિનિકમાંથી 4 દર્દી દાખલ હતા. તો હાજર નર્સે પણ કહ્યું કે, તેઓ છેલ્લા કેટલાક સમયથી અહીં કામ કરી રહ્યા છે.