મેઘતાંડવ / કોડીનાર અને સૂત્રાપાડામાં 10 જ કલાકમાં 10 ઈંચથી વધુ વરસાદ, હાઇવે-ઘર બધુ પાણીમાં ગરકાવ 

• કોડીનાર અને સુત્રાપાડા ધોધમાર વરસાદ 
• વહેલી સવારથી અત્યાર સુધીમાં 10 ઇંચ જેટલો વરસાદ
• 10 કલાકમાં 10 ઇંચ જેટલો વરસાદ  

હવામાન વિભાગ દ્વારા રાજ્યમાં ભારે વરસાદની આગાહી કરવામાં આવી છે તેવામાં આજે વરસાદની આગાહીને લઇને ગીર સોમનાથ જિલ્લાના કોડિનાર, સૂત્રાપાડા પંથકમાં અનરાધાર મેઘમહેર થઇ હતી. કોડીનાર અને સુત્રાપાડા પંથકમાં આભ ફાંટયું હોય તેમ આશરે 10 ઈંચ જેટલો વરસાદ ખબક્યો હતો. જેને લઇને વરસાદી પાણી ક્યાંય સમાયાના હોય તેવી સ્થિતિ સર્જાઇ હતી. ખેતરો તળાવમાં ફેરવાયા હતા અને માર્ગો તથા બજારો જાણે નદીઓ બન્યા હોય તેવા દ્રશ્યો જોવા મળ્યા હતા. 

મોટા ભાગના ગામો અને માર્ગો પાણીમાં ગરકાવ
રાજ્યમાં છેલ્લા બે દિવસથી સચરાચર મેઘાવી માહોલ જોવા મળી રહ્યો છે. મેઘાડંબર વચ્ચે મોટા ભાગના વિસ્તારોમાં ક્યાંય છૂટોછવાયો તો ક્યાંય સાંબેલાધાર વરસાદ ખાબકી રહ્યો છે. તેવામાં આજે  કોડીનાર અને સુત્રાપાડા પંથકને મેઘરાજાએ ઘમરોળી નાખ્યા હતા. આ પંથકમાં મેઘાએ ગાંડોતૂર થઇ વ્હાલ વરસાવ્યું હતું. જેને પગલે 10 કલાકમાં 10 ઈંચ જેટલું પાણી વરસ્યું હતું. આથી મોટાભાગના ગામ અને સ્ટેટ હાઈવે પાણીમાં ગરકાવ થયા હતા. વધુમાં ખેતરો પણ વરસાદી પાણીમાં ગળાડૂબ થયા હતા.આથી ક્યાંય ખેતરમાં લહેરાતા પાકને પણ નુક્સાન થવા પામ્યું હતું. ગામોમાં આડેધડ પાણી ઘૂસતા ગામના રસ્તાઓ અસ્તિત્વ ખોઇ બેઠા હોય તેવી સ્થિતિની નિર્માણ થયું હતું.

9 જુલાઈ સુધી ભારેથી અતિભારે વરસાદની આગાહી કરતું હવામાન વિભાગ
હવામાન વિભાગ દ્વારા રાજ્યમાં તા. 5 થી 7 જુલાઈના રોજ ભારેથી અતિભારે વરસાદ વરસવાની શક્યતા છે. તેમાં પણ  8 અને 9 જુલાઇના રોજ અતિભારે વરસાદની હવામાન વિભાગે આગાહી કરી છે. જેમાં દ્વારકા, પોરબંદર, જૂનાગઢ, અમરેલી, ગીર સોમનાથ, ભાવનગરમાં ભારેથી અતિ ભારે વરસાદ થઈ શકે છે.  વલસાડ, દમણ દાદરા નગર હવેલીમાં અતિ ભારે વરસાદની આગાહી કરાઇ છે. એ સિવાય ઉત્તર ગુજરાતમાં બનાસકાંઠા સાબરકાંઠામાં મહીસાગર દાહોદમાં ભારેથી અતિભારે વરસાદ વરસવાની આગાહી કરાઇ છે. જ્યારે અમદાવાદમાં છૂટા છવાયા વરસાદની આગાહી કરવામાં આવી છે.