ગૃહિણીઓ માટે રોજ રસોઈ બનાવવી અને બધાને ખુશ કરવા એ એક મોટું કામ હોય છે. આ સમયે જો કેટલીક નાની ટિપ્સની મદદ મળે તો તમે સરળતાથી કામ તો કરી શકો છો અને સાથે જ વખાણના હકદાર પણ બનો છો. તો જાણો આપણા ઘરોમાં રોજ બનતી રોટલી કે પૂરીને નરમ અને ફૂલેલી કઈ રીતે બનાવી શકાય તેની ટિપ્સ વિશે. જો તમે લોટ બાંધતી સમયે જ કેટલીક નાની વાતોનું ધ્યાન રાખશો તો તમારી રોટલી અને પૂરીના વખાણ આપોઆપ થશે અને ખાનારા રાજી થશે.
રોટલી કે પૂરી બનાવતા રાખો આ ધ્યાન
યાદ રાખી લો આ કામની 10 ટિપ્સ
લોટ બાંધતા કરી લો આ નાનું કામ
રોટલી બનાવતી સમયે લોટમાં થોડો ચોખાનો લોટ મિક્સ કરી દેવાય તો રોટલી નરમ બને છે. આ સાથે જ આ રોટલી પચવામાં પણ હલકી રહે છે.
રોટલી કે પૂરીનો લોટ બાંધતી સમયે પહેલાં મીઠું ના નાંખો. પરંતુ બાંધેલા લોટ પર મીઠું નાંખો અને ફરીથી તેને કેળવો.
રોટલી ફૂલાવતી સમયે ગેસ ફાસ્ટ રાખો, ગેસ ફાસ્ટ હોવાના કારણે રોટલી મુલાયમ બને છે.
પૂરી બનાવતી સમયે ગેસને મધ્યમ તાપે રાખો.
પૂરીનો લોટ બાંધતી સમયે દહીં કે દૂધથી લોટ બાંધો. આ સાથે લોટમાં ઘી કે તેલનું મોણ પણ ઉમેરો. ગરમ પૂરી ખાવામાં કુરકુરી અને માખણ જેવી મુલાયમ લાગશે. આ પૂરી 2 દિવસ સુધી ખરાબ પણ નહીં થાય.
રોટલી વણતી સમયે ઘઉંના લોટને બદલે મેંદાના લોટનો ઉપયોગ કરો. તેનાથી રોટલી સફેદ અને સુંદર બનશે.
મકાઈનો લોટ બાંધતી સમયે તેમાં પાણીની જગ્યાએ ઓસામણનો ઉપયોગ કરો. તેનાથી રોટલી મીઠી અને નરમ બનશે.
ક્યારેક પાકેલા કેળાથી પાણી વિના લોટ બાંધો. તેનાથી પણ રોટલી કે પરાઠા નરમ અને સ્વાદિષ્ટ બને છે.
પૂરીને ક્રિસ્પી બનાવવા માટે લોટમાં એક બે બાફેલી અળવી મિક્સ કરો.
રોટલીને વધારે મુલાયમ સ્વાદિષ્ટ બનાવવા માટે ગરમ પાણીથી લોટ બાંધો. તથા લોટને થોડો નરમ અને ઢીલો રાખો. રોટલી નરમ બનશે.