આગાહી / ઠંડીનું આ તો માત્ર ટ્રેલર હતું, જાણો હજુ કેટલા દિવસ ગુજરાત રહેશે ઠંડુગાર

• ઉત્તર ભારતમાં હિમવર્ષા યથાવત રહેતા ઠંડી પડશે
• 10 દિવસ સુધી ગુજરાત રહેશે ઠંડૂગાર 
• ઉત્તરાયણ સુધી રાજ્ય ઠંડીની સંભાવના

સમગ્ર ઉત્તર ભારતમાં ઠંડીનો ચમકારો વધી રહ્યો છે. હિમવર્ષાની સાથે સાથે લોકો ઠંડીમાં ઠુઠવાઈ રહ્યું છે. હજુ તો ડિસેમ્બર પૂર્ણ થયો છે. જાન્યુઆરી શરૂ થઈ છે એટલે કે હજુ તો ઠંડી બાકી છે. આ તો માત્ર ટ્રેલર હોય તેવી સ્થિતિ છે. ઉત્તરાયણ સુધી ગુજરાત ઠંડુગાર રહેવાની સંભાવના છે. રાજ્યમાં અઠવાડિયામાં ઠંડીમાં વધારો થવાની સંભાવના છે. નલિયા, અમદાવાદ, ડિસામાં ભારે ઠંડી યથાવત રહેશે.

ગુજરાતમાં ક્યાં કેટલી ઠંડી?

મહત્વનું છે કે, રાજ્યના 8 શહેરમાં તાપમાન 10 ડિગ્રીથી નીચે જતું રહ્યું છે. નલિયા રાજ્યનું સૌથી ઠંડુ શહેર રહ્યું છે. નલિયામાં તાપમાન 5.4 ડિગ્રીએ પહોંચી ગયું છે. તો ભુજમાં પણ રેકોર્ડ તૂટ્યો છે. ભુજમાં તાપમાન 7.6 ડિગ્રી સુધી ગગડી ગયું છે. તો અમરેલીમાં 8 ડિગ્રી, કંડલામાં 8.4 ડિગ્રી, રાજકોટ અને પોરબંદરમાં 9-9 ડિગ્રી તાપમાન નોંધાયું છે. બીજી તરફ ડીસામાં 9.6 ડિગ્રી, સુરેન્દ્રનગરમાં 9.8 ડિગ્રી તાપમાન નોંધાયું છે. તો ગાંધીનગરમાં તાપમાનનો પારો 10.5 ડિગ્રી સુધી ગગડ્યો છે. જ્યારે અમદાવાદમાં પણ પારો 11.6 ડિગ્રી સુધી ગગડી ગયો છે. ઠંડી વધવાના કારણે લોકોની મુશ્કેલી વધી ગઈ છે. વહેલી સવારે લોકો બહાર નીકળવાનું ટાળી રહ્યા છે. તો બીજી તરફ લોકો ઠંડી ભગાવવા માટે જોગિંગ અને કસરતનો સહારો લઈ રહ્યા છે.

ઉત્તર ભારતમાં હિમવર્ષા યથાવત રહેતા ઠંડી પડશે

ઉલ્લેખનીય છે કે, જમ્મૂ-કાશ્મીર, હિમાચલ અને ઉત્તરાખંડમાં ભારે હિમવર્ષા થઈ છે. તો મેદાની પ્રદેશોમાં ઠંડીનો ચમકારો વધ્યો છે. જેના કારણે પારો ગગડ્યો છે. તો બીજી તરફ ધુમ્મસનો પણ કહેર જોવા મળી રહ્યો છે. દિલ્હી અને તેની આસપાસના શહેરોમાં ધુમ્મસે સામ્રાજ્ય જમાવ્યું છે. જેના કારણે વાહનચાલકો પરેશાન થઈ રહ્યા છે. લેહની વાત કરીએ તો ત્યાં તાપમાનનો પારો માઈનસ 15 ડિગ્રી સુધી ગગડ્યો છે. જ્યારે હિમચાલના કેલોંગમાં પારો માઈનસ 8 ડિગ્રીએ પહોંચ્યો છે. ગુલમર્ગમાં માઈનસ 7 ડિગ્રી, શ્રીનગરમાં માઈનસ 3 ડિગ્રી તો દિલ્હીમાં 4 અને અમૃતસરમાં 3 ડિગ્રી સુધી પારો ગગડ્યો છે. આ તરફ મનાલી, શિમલા, કલ્પા અને અન્ય પહાડી વિસ્તારોના પણ કંઈક આવા જ હાલ છે.