પાટણઃ આજના ડિજિટલ યુગમાં ભણતરને હાઇટેક બનાવવા માટે ખાનગી શાળાઓમાં કોમ્પ્યુટર લેપટોપ તેમજ ટેબલેટ જેવી અત્યાધુનિક સુવિધાઓ વિદ્યાર્થીઓને પૂરી પાડવામાં આવતી હોય છે. પરંતુ અમે આપને એક એવી શાળા બતાવવા જઈ રહ્યા છે કે ત્યાં કોમ્પ્યુટર તો દૂર રહ્યું અહીના વિદ્યાર્થીઓના માથે છત પણ નથી કે નથી શાળામાં લાઈટ કે શૌચાલય. ગુજરાત સરકારના ભણશે ગુજરાત અને ગતિશીલ ગુજરાતના દાવાનાં લીરેલીરા ઉડાડતો કિસ્સો....
શાળા આપો સરકાર...
પાટણ જિલ્લાને ભલે શિક્ષણની નગરી કહેવામાં આવતી હોય. ઉત્તર ગુજરાત યુનિવર્સિટી ભલે પાટણ જિલ્લાને મળી હોય. પરંતુ આજે પણ આ જિલ્લામાં સરકારી ભણતર કેટલી હદે કથળ્યું છે. તેનું ઉત્તમ ઉદાહરણ રાધનપુર તાલુકાનું જૂનું ધરવડી ગામ બન્યું છે. વાત વિસ્તરથી કરીયેતો પાટણ જિલ્લાના રાધનપુર તાલુકાના જુના ધરવડી ગામે ધોરણ ૧થી ૫ના 60 જેટલા વિદ્યાર્થીઓ ધરવડી ગ્રામ પંચાયતના ખોડીયાર માતાના મંદિરમાં છેલ્લા દસ મહિનાથી લઈ રહ્યા છે શિક્ષણ.
૬૦ માસુમ બાળકો ખોડીયાર માતાના મંદિર...
ગત વર્ષ આવેલા ભારે વરસાદ અને પુરના લીધે શાળાના મકાનને ભારે નુકસાન થયેલ ત્યારબાદ આ શાળાને ખોડિયાર માતાના મંદિરે ફેરવવામાં આવેલ. ત્યારથી એકથી પાંચ ધોરણના ૬૦ માસુમ બાળકો ખોડીયાર માતાના મંદિર પટાંગણમાં ભણવા મજબુર બન્યા છે. એક શિક્ષક તેમજ એક શિક્ષિકા હાલ તો આ બાળકોને ઝાડ નીચે તેમજ મંદિરના ખુલા સેડ નીચે ભણાવી રહ્યા છે.
બાળકોના માથે જોખમ...
જૂની ધરવડી ગામના શિક્ષકો જણાવી રહ્યા છે કે અમારી શાળામાં હાલ કોઈ જ પ્રકારની સગવડ નથી. શાળા ગામથી થોડે દૂર આવેલ હોય બાળકોને લેવા પણ જવું પડે છે. બાળકોને પીવાના પાણી માટે કોઈ સગવડ નથી. શૌચાલય કે લાઈટ જેવી કોઈપણ સગવડ અમારી હાલ ચાલતી આ શાળા પાસે ના હોવાને કારણે બાળકોને અનેક યાતનાઓનો સામનો કરવો પડી રહ્યો છે. અવાવરૂ જગ્યામાં ચાલતા આ શાળામાં ઝેરી જીવ જંતુઓથી પણ બાળકોના માથે જોખમ મંડાયેલું છે. દસ દસ મહિનાના વહાણા વાઈ ગયા છતાં પણ અમારી તૂટેલી શાળા ઉભી કરવામાં ના આવતા આજે આ 60 કુમળા વિદ્યાર્થીઓનું ભાવિ અધ્ધરતાલ બનવા પામ્યું છે. ચાલુ સાલે પાટણ જિલ્લામાં અનેક નેતાઓ દ્વારા શાળા પ્રવેશ ઉત્સવ બનાવવામાં આવ્યા અને ફોટો સેસન કરીને સબ સલામતના બડગા ફૂંકવામાં આવ્યા. પરંતુ એક પણ નેતાએ આ શાળાના બાળકોની મુલાકાત નથી લીધી તે ચિંતાનો વિષય કહી શકાય.
ધુણા ઉપર કુમળી વયના માસુમ વિદ્યાર્થીઓ શિક્ષણ...
મંદિરોમાં રહેલ ત્રિશુળ અને ધૃણા ઉપર આમ તો સાધુ સંતો અને અઘોરી બાવાઓ બેસતા હોય છે. પરંતુ આજે રાધનપુરનાં ધરવડી ગામે આ ધુણા ઉપર કુમળી વયના માસુમ વિદ્યાર્થીઓ શિક્ષણ લઇ રહ્યા છે. સરકાર માટે કદાચ આજ ડિજિટલ ઇન્ડિયાનું ભણતર હોય તેવું લાગી રહ્યું છે. તો ગામના આગેવાનોએ પણ શાળાનું બાંધકામ નવીન બનાવી આપવામાં આવે તેની રજૂઆતો અનેકવાર સત્તાધીશોને કરી છે. છતાં પણ આજ દિન સુધી આ શાળાનું નવીન બાંધકામ કરવામાં ના આવતા આજે શાળાના બાળકો લાચારી સાથે ખુલ્લામાં ભાર સાથેનું ભણતર મેળવી રહ્યા છે.
આજે પણ જાણે અઢારમી સદીની શાળા...
હાલ તો ગામના આગેવાનો પણ સરકાર પાસે વિનંતી કરી રહ્યા છે કે ગામના માસુમ બાળકોને માથે શિક્ષણની છતા આપવામાં આવે. શિક્ષણ આપવું અને મેળવવું તે બંને આપણો બંધારણીય હક્ક છે. આજે શાળાઓ કોમ્પ્યુટર રાઈઝ બની છે. ત્યારે જુના ધરવડી ગામે ચાલતી શાળા આજે પણ જાણે અઢારમી સદીની શાળા હોય તેવો ભાસ કરાવી રહી છે. માસુમ વિદ્યાર્થીઓની વેદનાથી જવાબદાર સત્તાધીશોની જાડી ચામડી જાગે અને આ બાળકોના હિતમાં જલ્દી કોઈ નિર્ણય લેય તેજ હાલના સમયની તાતી માંગ છે.