મહારાષ્ટ્ર વિધાનસભાની 288 બેઠકો માટે આજે સામાન્ય ચૂંટણી યોજાઈ ગઈ. અનેક નાગરિકોએ મતદાનના પર્વને વધાવી લીધું. જો કે મતદાનની શરૂઆત થોડી ધીમી રહી પરંતુ તેણે તે પછી રફ્તાર પકડી. 18 વર્ષના નવયુવાનોએ તથા સદી વટાવી ચૂકેલા વરિષ્ઠ નાગરિકોએ પણ મતદાન પર્વમાં અજબની સ્ફૂર્તિ દેખાડી. તો નાગરિકોએ કોઈએ પોતાના દર્દની પણ પરવા કર્યા વગર મતદાન કરવા ઉમટી પડયા. કદાય આવા નાગરિકોના કારણે જ લોકશાહી ટકી રહી છે.
મહારાષ્ટ્ર અને હરિયાણામાં યોજાઇ ચૂંટણી
102 વર્ષના દાદા મતદાન કરવા આવતા લોકોમાં કૌતુક
મતદાનને લોકશાહીનું સૌથી મોટું પર્વ માનવામાં આવે છે. મહારાષ્ટ્રમાં મતદાનની ગતિ થોડી ધીમી જોવા મળી પરંતુ વરિષ્ઠ નાગરિકોએ મતદાન કરવામાં જે ઉત્સાહ દેખાડયો તેણે લોકશાહી પર્વમાં જોશ ભરી દીધું.
90 થી 100 વર્ષના નાગરિકોએ નિભાવી ફરજ
મુંબઈમાં મતદાન દરમિયાન એવી અનેક તસવીરો સામે આવી છે કે જ્યાં 90 વર્ષથી માંડી 100 વર્ષના જાગરૂક મતદારો જ્યારે તેમનો મત આપવા પહોંચ્યા તો દરેકની નજર તેમના પર ગૌરવભેર મંડાઈ ગઈ. 100 વર્ષના વરિષ્ઠ નાગરિક અને પૂર્વ રમતવીર રામ શર્મા, 100 વર્ષીય રામ શર્માએ લોકશાહી પ્રત્યે પોતાની લાગણી અને સમર્પણનું દ્રષ્ટાંત રજૂ કર્યું છે.
સ્મૃતિ ઇરાનીએ ગણાવ્યા હિરો
મહારાષ્ટ્રમાં માત્ર એક નહી આવા અનેક દ્રશ્યો જોવા મળ્યા છે જ્યાં જૈફ વયે પહોંચેલા વરિષ્ઠ નાગરિકોએ મતાધિકારનો ઉપયોગ ઉત્સાહભેર કર્યો. આવા જ એક અન્ય 93 વર્ષીય નાગરીકે મુંબઈમાં મતદાન કર્યું. 93 વર્ષના આ નાગરિકની કેન્દ્રીય મંત્રી સ્મૃતિ ઈરાનીએ ઘણી પ્રસંશા કરી. મતદાન કર્યાની શાહીનું નિશાન દર્શાવી રહેલા આ વરિષ્ઠ નાગિરક ખન્નાજી ભૂતકાળમાં સેનામાં પણ સેવા આપી ચૂક્યા છે. 93 વર્ષીય આ નાગરિકનો મતદાન કરાવનો ઉત્સાહ આપણે પ્રેરિત કરી રહ્યો છે. સ્મૃતિ ઈરાનીએ આ વરિષ્ઠ નાગરિકને હિરો ગણાવ્યા હતા.
કેન્સરના દર્દીએ પણ કર્યું મતદાન
મતદાનનો અવસર પાંચ વર્ષે એકાદવાર જ મળતો હોય છે. એટલે લોકોમાં મતદાન માટે ભારે ઉત્સાહ જોવા મળે તે સ્વાભાવિક છે. મંગેશ મહાત્રે નામના આ કેન્સરના દર્દીએ પણ મતદાનમાં હિસ્સો લઈને અદભુત જુસ્સા અને ઉત્સાહની ઉદારણ પૂરું પાડયું છે. આ વ્યક્તિને કેન્સરની બીમારી પણ મતદાન કેન્દ્ર સુધી જતા રોકી શકી નથી. મંગેશ મહાત્રેએ પોતાની પત્ની સાથે મતદાન કેન્દર સુધી જઈને પોતાના મતાધિકારનો ઉપયોગ કર્યો અને એક જવાબદાર નાગરિકો હોવાનો પરિચય આપ્યો.
102 વર્ષીય 'દાદા' આવ્યા મતદાન કરવા
તો બીજી તરફ મહારાષ્ટ્રના પૂણેમાં પણ હાજી ઈબ્રાહીમ નામના એક 102 વર્ષીય વરિષ્ઠ નાગરિકે મતદાન કર્યું તો સહુની નજર તેમના પર ચોંટી ગઈ. પોતાના 40 સભ્યો વાળા ફેમિલી સાથે મતદાન કેન્દ્ર પર વ્હીલચેરના સહારે જઈને હાજી ઈબ્રાહીમે મતદાન કર્યું હતું. દેશ આઝાદ થયો ત્યારથી આ વરિષ્ઠ નાગરિક મતદાન કરતા આવ્યા છે. તેઓ હોસ્પિટલમાં સારવાર લઈ રહ્યા હતા છતાં દર્દની કે ઉંમરની પરવા કર્યા વગર મતદાન કરવા પહોંચ્યા હતા.
આ વરિષ્ઠ નાગરિકો દ્વારા જે પ્રકારે મતદાન કરવામાં ઉત્સાહ જોવા મળ્યો તે દર્શાવે છે કે, મતદાન કરવું તે દરેક મતદારની જવાબદારી છે. એક નાગરિક તરીકે આપણે આપણી જવાબદારી નિભાવવામાં બેદરકારી દાખવીએ અને પછી સરકારની ટીકા કરીએ છીએ તે વાત વાજબી નથી. આ વરિષ્ઠ નાગરિકો એ સંદેશો આપી રહ્યા છે કે, અમને મતદાન કરતાં કોઈ સંજોગો રોકી નથી શકતાં તો તમને કોણ રોકી શકે છે?