રાજ્યમાં આગામી ત્રણ દિવસ સુધી ભારે વરસાદની આગાહી વચ્ચે સૌરાષ્ટ્રમાં વરસાદની મેઘમહેર જોવા મળી રહી છે. સૌરાષ્ટ્રના પોરબંદર, દ્વારકા, રાજકોટ સહિત અનેક જગ્યાઓ પર વરસાદનો કહેર જોવા મળ્યો છે. ભારે વરસાદના પગલે સૌરાષ્ટ્રના અનેક ડેમો ફરી છલકાયાં છે.
દેવભૂમિ દ્વારકાના યાત્રાધામ હર્ષદ પાણીમાં ગરકાવ
દ્વારકા જિલ્લાના તમામ ડેમો, તળાવો છલકાયાં
ભારે પવન અને વીજળીના કડાકા સાથે રાજકોટ જિલ્લામાં સાર્વત્રિક વરસાદ
દ્વારકા જિલ્લામાં તમામ તાલુકામાં વરસાદ, જિલ્લાના તમામ ડેમો, તળાવો છલકાયાં
દ્વારકા જિલ્લામાં તમામ તાલુકામાં વરસાદી માહોલ જોવા મળી રહ્યો છે. દ્વારકાના લાંબા ગામમાં 12 કલાકમાં 16 ઈંચ વરસાદ નોંધાયો છે. જ્યારે ભાણવડમાં 12 કલાકમાં 14 ઈંચ વરસાદ વરસ્યો છે. જેના કારણે દ્વારકા જિલ્લામાં આભ ફાટ્યા જેવી સ્થિતિ સર્જાઈ છે. જામકલ્યાણપુર તાલુકામાં લીલા દુષ્કાળની સ્થિતિ સર્જાઈ છે. છેલ્લા 24 કલાકમાં દ્વારકા જિલ્લામાં 4થી 16 ઈંચ વરસાદ નોંધાયો છે. ભારે વરસાદના કારણે જિલ્લાના તમામ ડેમ અને તળાવો છલકાઈ ગયા છે.
દ્વારકાના જામરાવલ ગામનો કપાયો સંપર્ક
દ્વારકામાં ભારે વરસાદના કારણે દ્વારકાના જામરાવલ ગામનો સંપર્ક કપાઈ ગયો છે. જામરાવલના મુખ્ય માર્ગો પરથી ધસમસતું પાણી વહી રહ્યું છે. જેના કારણે રાવલ, બારીયાધાર અને હનુમાનધાર જવાનો માર્ગ બંધ થઈ ગયો છે. જામરાવલ ગામમાં 30 હજારથી વધુની વસ્તી છે. પૂરના કારણે ગ્રામજનો મુશ્કેલીમાં મુકાયા છે. વર્તુ-2 ડેમના 17 દરવાજા ખોલવામાં આવ્યા છે. જ્યારે સાની ડેમના દરવાજા પણ ખોલવામાં આવ્યા છે.
ભારે વરસાદને કારણે સિંધણી અને ધી ડેમ થયો ઓવરફ્લો
દેવભૂમિ દ્વારકામાં મૂશળધાર વરસાદ પડી રહ્યો છે. સતત વરસી રહેલા વરસાદને કારણે સતાપર ગામનો સિંધણી ડેમ ઓવરફ્લો થયો છે. ડેમ આવરફલો થતાં ખેડૂતોમાં ખુશીનો માહોલ છવાયો છે. દ્વારકામાં સતત વરસાદ વરસી રહ્યો છે. ભારે વરસાદ થતાં જિલ્લાનો વધુ એક ડેમ ઓવરફ્લો થયો છે. પાણીની આવક થતા ધી ડેમ ઓવરફ્લો થયો છે.
સમુદ્રમાં સર્જાયું વંટોળ, દરિયાના પાણીની બની ડમરી, લોકોમાં ભારે કુતૂહલ
દ્વારકાના કુરંગા ગામ નજીક દરિયા કિનારે અદભૂત દ્રશ્યો જોવા મળ્યા છે. વરસાદી માહોલની સાથે વંટોળ આવતાં દરિયાના પાણી આકાશ સુધી પહોંચતા નજરે પડ્યા હતા. દરિયામાં વંટોળ આવતાં એક ડમરી બની જે આકાશથી સીધી દરિયાની જળસપાટી સાથે ટચ થતી નજરે પડી. જ્યાંથી પાણીની એક ડમરી સર્જાઈ હતી. જેમાં દરિયાનું પાણી આકાશમાં ચઢી રહ્યું હતું. જેને ટોર્નેડો પણ કહેવામાં આવે છે. જેમાં હવાનું એક પ્રચંડ ચક્ર હોય છે. અને સંતભ આકારનું આ પવનનું ચક્ર પૃથ્વીથી વાદળ સાથે જોડાયેલું હોય છે. આ પ્રકારના દ્રશ્ય ભાગ્યે જ જોવા મળે છે. ત્યારે આ અદભૂત નજારો ગ્રામજનોએ પોતાના મોબાઈલમાં કેદ કર્યો હતો. જો કે દુર્લભ નજારો દેખાતાં ગ્રામજનોમાં ભારે કુતૂહલ જોવા મળ્યું હતું.
રાજકોટ જિલ્લામાં સાર્વત્રિક વરસાદ
રાજકોટ જિલ્લામાં તમામ તાલુકામાં વરસાદી માહોલ જોવા મળી રહ્યો છે. ઉપલેટામાં 12 કલાકમાં 3 ઈંચ વરસાદ નોંધાયો છે. જ્યારે કોટડા સાંગાણીમાં 12 કલાકમાં 3.5 ઈંચ વરસાદ વરસ્યો છે. જેના કારણે જિલ્લામાં આભ ફાટ્યા જેવી સ્થિતિ સર્જાઈ છે. ગોંડલમાં સવા 4 ઈંચ વરસાદપડતા લીલા દુષ્કાળની સ્થિતિ સર્જાઈ છે. છેલ્લા 24 કલાકમાં જિલ્લામાં 4થી 16 ઈંચ વરસાદ નોંધાયો છે. ભારે વરસાદના કારણે જિલ્લાના તમામ ડેમ અને તળાવો છલકાઈ ગયા છે.