દેશભરમાં ઓનલાઇન વેપાર વધી રહ્યો છે. લોકોને ઘરે બેઠાં, ગમે તે સમયે ખરીદી કરી શકે છે અને તેમને માર્કેટ કરતાં સસ્તા ભાવે વસ્તુઓ મળી જાય છે. તેથી વધુને વધુ લોકો ઓનલાઇન ખરીદી કરવા તરફ વળ્યા છે. લોકોને ફાયદો જરૂર થાય છે પરંતુ દુકાન સજાવીને વસ્તુઓ વેચતા વેપારીઓને પારાવાર હાની થાય છે.
ઓનલાઇન વેપાર વિરોધ
વેપારીઓએ ઇ-કોમર્સની જાહેરાત કાળા કપડાંથી ઢાંકી કર્યો વિરોધ
ઇ- કોમર્સમાં મળતું ડિસ્કાઉન્ટ ગ્રાહકોને આકર્ષે છે પરંતુ આવું અને આટલું ડિસ્કાઉન્ટ સામાન્ય વેપારીઓ આપી શકતા ન હોવાથી અનેક વખતે તહેવારોની સીઝનમાં પણ તેમની દુકાનમાં કાગડા ઉડે છે. આવી સ્થિતિનો વિરોધ પૂર્વ કચ્છના મોબાઇલના વિક્રેતાઓએ અનોખી રીતે કર્યો છે. અંજાર અને ગાંધીધામ શહેરોમાં લાગેલા મોબાઇલ કંપનીઓના હોર્ડિંગ્ઝ પર કાળું કપડું લગાવીને જાહેરાતોને ઢાંકી દેવાઇ છે.
કંપનીઓ આપી રહી છે સારું ડિસ્કાઉન્ટ
મોબાઇલ કંપનીઓ ઇ- કોમર્સ અને સામાન્ય વેપારીઓ પ્રત્યે ભેદભાવભરી નીતિ અખત્યાર કરે છે. ઓનલાઇન વેચાણ માટે અનેક મોબાઇલ કંપનીઓએ ખૂબ પ્રોત્સાહન આપ્યું છે. મોબાઇલ ઓનલાઇન વેચનારી ઇ- કંપનીઓ આવા પ્રોત્સાહનના પગલે ગ્રાહકોને ખૂબ સારૂં ડિસ્કાઉન્ટ આપે છે.
વેપારીઓની હાલત કફોડી
જ્યારે દુકાનના મોંઘા ભાડા ખર્ચીને વર્ષોની શાખ જમાવીને બેઠેલા વેપારીઓને મોબાઇલ કંપનીઓ દ્વારા આવું પ્રોત્સાહન અપાતું નથી. તેથી તેઓ ગ્રાહકોને ડિસ્કાઉન્ટ આપી શકતા નથી. આથી ગ્રાહકો ઇ- કોમર્સ તરફ આકર્ષાય છે અને રિટેઇલ વેપારીઓની હાલત કફોડી બને છે.
કચ્છના દુકાનદારોમાં આક્રોશ
કચ્છ સહિત દેશઆખાના મોબાઇલના શોરૂમધારકો કે દુકાનદારોને આ સમસ્યા પડી રહી હોવાથી ઓલ ઇન્ડિયા મોબાઇલ એસોસિએશન દ્વારા સરકાર સમક્ષ વારંવાર આ અંગે રજૂઆતો કરાઇ હોવા છતાં આ અંગે કોઇ ઠોસ પગલાં લેવાયા નથી કે મોબાઇલ કંપનીઓને ભેદભાવભરી નીતિ અખત્યાર ન કરવા સુચના સુદ્ધા અપાઇ નથી.
આ ઉપરાંત મોટાભાગની મોબાઇલ કંપનીઓ નવા મોડેલ પહેલા ઇ- કોમર્સ કંપનીઓ પર વેચવા માટે મુકે છે. રિટેલર્સ કે શોરૂમધારકોને નવા મોડેલ વેચવા માટે અપાતા નથી. આથી પણ શોરૂમધારકો ધાર્યો વેપાર કરી શકતા નથી. નવા મોડેલ ઓનલાઇન વેચાણની સાથે રિટેલર્સ પાસે પણ વેચાણઅર્થે મુકવા જોઇએ, જેથી તેનો વેચાણનો લાભ તમામ વેપારીઓને મળી શકે. તેમ જ મોબાઇલના વેચાણ માટે અપાતું પ્રોત્સાહન પણ ઇ- કોમર્સ કંપનીઓ અને રિટેલર્સને સરખું જ આપવું જોઇએ.
હોર્ડિગ્સ પર લગાવવામાં આવ્યું કાળુ કપડું
આવા વિવિધ પ્રશ્નો અંગે સરકારનું વારંવાર ધ્યાન દોરાયું હોવા છતાં પગલાં ન લેવાતા અને દિવાળીની ખરીદીની સીઝનમાં પણ રિટેલર્સ પાસે પુરતું વેચાણ થતું ન હોવાથી પૂર્વ કચ્છના અંજાર અને ગાંધીધામના વેપારીઓએ નવતર વિરોધ કર્યો હતો. તેમણે દુકાનોની બહાર અને રસ્તાઓ પર લાગેલા મોબાઇલ કંપનીના હોર્ડિંગ્ઝ પર કાળું કપડું ઢાંકીને તેનું વેચાણ અટકાવવાનો પ્રતિકાત્મક પ્રયાસ કર્યો હતો. આ બન્ને શહેરોની અંદાજે 30- 30 દુકાનોની બહાર લાગેલા હોર્ડિંગ્ઝ ઢાંકી દેવાયા હતા.