વલસાડ નજીક સામાન્ય તકરારમાં મિત્રએ જ મિત્રની હત્યા કરી દીધી છે.એક મિત્રએ કારથી ટક્કર મારીને અન્ય મિત્રની હત્યા કરી દીધી છે.અન્ય મિત્રોએ આરોપ લગાવ્યો છે કે મહારાષ્ટ્રના તલસારી નજીક ઈરાદાપૂર્વક અન્ય મિત્રએ કારથી ટક્કર મારી હતી.જેમાં એક મિત્રનું મોત નિપજ્યું છે.
આ ઘટનાની મળતી માહિતી મુજબ પ્રતીક પટેલ ગઇકાલે તેના મિત્રવર્તૃળ સાથે ભીલાડ નજીક રહેલ મહારાષ્ટ્રના અચ્છાડ ખાતે આવેલી મેંગો રિસોર્ટમાં નજીકના એક મિત્રની બર્થડે પાર્ટીમાં ગયો હતો.
જ્યાં પ્રતીક સાથે તેનો મિત્ર પરમજીત સિંહ અને પાર્ટીમાં આવેલા નિમેષ તન્ના નામના શખ્સ સાથે સામાન્ય બોલાચાલી થતા મામલો મારામારી સુધી પહોંચી ગયો હતો. લોકોએ બંનેને સમજાવી છુટા પાડ્યા હતા.
પરમજીતના જણાવ્યા મુજબ બર્થડે પાર્ટી પૂરી થયા બાદ પ્રતીક તેના મિત્ર પરમજીત સિંહ વિવેક શુક્લા હેમુ ઠાકુર અને રબીજા સાથે તેની કાર ઘર તરફ લઇ પરત વાપી આવવા નીકળ્યો હતો.
અચ્છાડથી દોઢ કિમી પહોંચતા નિમેષ તન્નાએ તેની કારથી પ્રતીકની કારને ટક્કર મારી આગળ નીકળી ગયો હતો. જે બાદ પ્રતીક કારને રોકી નુકસાન જોવા માટે નીચે ઉતર્યો હતો.
તે દરમિયાન નિમેષે ફરી કારને ટર્ન મારી પ્રતીકને ટક્કર મારી હતી. જેમાં પ્રતીકને પગના ભાગે ગંભીર ઇજા થતા તેના મિત્રો તેને રસ્તાની સાઇડ ઉપર લઇ જઇ રહ્યા હતા. તે જ સમયે નિમેષે બીજીવાર કારથી પ્રતીકને કચડવા આવતા તેના મિત્રો સાઇડ પર હટી ગયા હતા. પ્રતીક ઉપર કાર ચઢાવતા તેને ગંભીર હાલતમાં વાપીની હરિયા હોસ્પિટલમાં ખસેડાયો હતો. જ્યાં હાજર તબીબે તેને મૃત જાહેર કરી દીધો હતો.