મહિલાઓને પોતાના હેન્ડબેગથી બહુ પ્રેમ હોય તેમાં શંકાને સ્થાન નથી. પરંતુ શું એટલો પણ પ્રેમ હોઇ શકે કે મહિલા ખુદ બેગની સાથે એક્સ-રે સ્કેનરમાં ઘૂસી જાય? દક્ષિણ ચીનમાં આવી જ એક ઘટના બની. રેલવે સ્ટેશન પર સિક્યુરિટી ચેકિંગ દરમિયાન હેન્ડબેગની સાથે મહિલા પણ એક્સ-રે મશીનમાંથી પસાર થઇ હતી. સોશ્યલ મીડિયા પર આ ઘટનાનો વીડિયો વાયરલ થયો છે.
રવિવારે રેલવે સ્ટેશને મહિલાને જ્યારે સિક્યુરિટી ચેકિંગ માટે પોતાની હેન્ડબેગ એક્સ-રે મશીનમાં મુકવા માટે કહેવામાં આવ્યું ત્યારે મહિલા બેગ મુકવા માટે રાજી તો થઇ ગઇ પણ એકલું બેગ મુકવાની તેની હિંમત ન ચાલી અને પોતે પણ એક્સ-રે મશીનમાં બેસી ગઇ હતી.
વાયરલ થયેલા વીડિયોમાં દેખાઇ રહ્યું છે કે અન્ય લોકો એક્સ-રે મશીનની બીજી બાજુ સામાન લેવા માટે લાઇનમાં ઉભા હતા અને સામાનની જોડે અંદરથી મહિલા પણ નીકળી. મહિલાને જોતાં જ સૌ કોઇ ચોંકી ઉઠ્યા હતા.
જણાવી દઇએં કે હેન્ડબેગમાં રાખેલા રૂપિયા ખોવાઇ શકે છે તેવા ડરે મહિલાએ આ પગલું ભર્યું હતું. ઇન્ટરનેટ પર અનેક યૂઝર્સે મહિલાની ઠેકડી ઉડાવી છે. અમુક યૂઝર્સે કહ્યું કે મહિલાને પોતાની જીંદગી અને સુરક્ષાથી વધુ પૈસાની પડી છે. મશીનમાં ઉપયોગમાં લેવાતી તાકતવર એક્સ-રે સ્વાસ્થ્ય માટે ખતરનાક સાબિત થઇ શકે છે.