કોહલીએ ફટકારી સેન્ચુરી પોન્ટિંગ અને સ્મિથના તોડ્યા આ રેકોર્ડ્સ

ટીમ ઇન્ડિયાના કેપ્ટન વિરાટ કોહલીએ શ્રીલંકા વિરુદ્ધ ચાલી રહેલી નાગપુર ટેસ્ટમાં શાનદાર સેન્ચુરી ફટકારી છે. આ તેમની બીજી મેચમાં બીજી સેન્ચુરી છે. આ સાથે તેણે ઘણા રેકોર્ડ્સ પણ બનાવી દીધા છે. કેપ્ટન તરીકે આ તેમની 12મી અને ઓવરઓલ 19મી સેન્ચુરી છે. હવે તે સૌથી વધારે સેન્ચુરી કરનાર ભારતીય કેપ્ટન બન્યો છે. તેણે સુનીલ ગાવસ્કરનો રેકોર્ડ તોડી નાખ્યો છે. સુનીલ ગાવસ્કરના નામ પર 11 સેન્ચુરી છે જ્યારે મોહમ્મદ અઝરુદ્દીનના નામે 9 સેન્ચુરી છે.

આ વર્ષે વિરાટ કોહલી દરેક ફોર્મેટમાં 10 સેન્ચુરી ફટકારી ચૂક્યો છે. તેણે ભૂતપૂર્વ ઑસ્ટ્રેલિયન કેપ્ટન રિકી પૉન્ટિંગનો રેકોર્ડ તોડી નાખ્યો છે. પૉન્ટિંગે વર્ષ 2005 અને વર્ષ 2006માં મળીને કુલ 9-9 સેન્ચુરી ફટકારી હતી જે એક કેલેન્ડર વર્ષમાં સૌથી વધારે સેન્ચુરી નો રેકોર્ડ હતો. આ લિસ્ટમાં સાઉથ આફ્રિકાના ગ્રીમ સ્મિથ ( વર્ષ 2005માં 9 સેન્ચુરી)નું નામ પણ સામેલ છે. આ વર્ષે વનડેમાં વિરાટ કોહલીએ અત્યાર સુધી સૌથી વધારે 6 સેન્ચુરી ફટકારી છે જ્યારે ટેસ્ટમાં 4 સેન્ચુરી ફટકારી દીધી છે. આ લિસ્ટમાં હવે આગળ વધુ સેન્ચુરી પણ જોડાય તેવી શક્યતા છે.

ટેસ્ટમાં 4 વખત બેવડી સેન્ચુરી નોંધાવનાર વિરાટે રાહુલ દ્રવિડના એક કેલેન્ડર વર્ષમાં 19 વખત 50 કે તેથી વધુ રનોની ઈનિંગ રમવાના રેકોર્ડની પણ બરોબરી કરી છે. રાહુલ દ્રવિડ 2006માં જ્યારે પોતે કેપ્ટન હતા ત્યારે તેઓએ 19 વખત 50 કરતા વધુ રનોની ઈનિંગ રમ્યા હતા. ત્રીજા ક્રમાંકે સૌરવ ગાંગુલી છે. તેમણે વર્ષ 2002માં 17 વખત 50 કે તેથી વધુ રન ફટકાર્યા છે.