સરકારી કર્મચારીઓને જલસા ! વાસીઉતરાયણની ચોપડે રજા ન હોવા છતાં જાતે પાડી રજા

અમદાવાદઃ ઉતરાયણનાં દિવસે સરકારી ઓફિસમાં કર્મચારીઓ અને અધિકારીઓને રજા આપવામાં આવે છે. પરતું વાસી ઉતરાયણની સરકારી ચોપડે રજા નથી હોતી પરંતુ કેટલીક ઓફિસો દ્વારા જાતે જ રજા પાડી દેવામાં આવી છે.

અમદાવાદના એલિસબ્રિજ વિસ્તારમાં આવેલ યુનીર્વસીટી ગ્રંથ નિર્માણ બોર્ડનાં તમામ સભ્યોએ સરકારના નિયમ વિરૂદ્ધમાં જઈને રજા પાડી હતી. આ જ બિલ્ડીંગમાં આવેલા રાષ્ટ્રીય સેવા આયોગનાં પણ તમામ કર્મચારીઓ પણ જાતે જ રજા પાડી હતી. ઓફિસ ખુલ્લી જોવા મળી હતી પણ તમામ કર્મચારીઓની ખુરશીઓ ખાલી જોવા મળી હતી.

માત્ર કોન્ટ્રાક્ટ પ્રથા પર કામ કરતા સિક્યોરીટીની ફરજ બજાવતાં એક વ્યક્તિ સિવાય તમામ લોકો વાસી ઉતરાયણ રજા ઉપર હતાં. જેને કારણે પુસ્તક લેવા માટે આવેલા વિદ્યાર્થીઓ નિરાશ થઈને પરત ફર્યાં હતાં. સરકારી રજા ન હોવા છતાં રજા પર ઉતારી ગયેલા 14 કર્મચારી સામે કેવા અને ક્યારે પગલાં ભરવામાં આવે છે તે હવે જોવું રહ્યું.