સુરત મનપાની સામાન્ય સભા બની તોફાની મેયરડેસ્ક પર દરખાસ્તના કાગળો ફેંકાયા

સુરત મહાનગર પાલિકાની સામાન્ય સભા સોમવારે તોફાની બની હતી.પાલિકાના બજેટ પહેલાની સામાન્ય સભામાં ત્રણ મહત્વના કામો શાસકો દ્વારા તાત્કાલિક ધોરણે લાવવામાં આવ્યા હતાં.જેમાં 1995-96 બાદ 22 વર્ષે લોકોને આપવામાં આવતા પાણીના કનેક્શન ડ્રેનેજ કનેક્શન અને ટેન્કર વડે પાણી પહોંચાડવાના કામના ચાર્જ વધારવામાં આવતા હતાં. આ કામ સ્થાયી સમિતિ ચેરમને દ્વારા સામાન્ય સભામાં મુકવામાં આવ્યા હતાં. જેમાં નવા તમામ પીવાના પાણીના કનેક્શનના ચાર્જ વધારવામાં આવ્યા હતાં.

ઉલ્લેખનીય છે કે 100 થી 4800 સુધીના ચાર્જ વધારી 400 થી 9600 કરવામાં આવ્યા છે.તો સાથે જ પેનલ્ટી રકમ 2500 થી 40000 છે જે વધારી 5000 થી 80000 કરવામાં આવી છે. આવી જ રીતે ડ્રેનેજ ચાર્જીસ પણ 1996-97 બાદ ડબલ કરવામાં આવ્યા છે. આમ 500નો ચાર્જ વધારી 1000 કરવામાં આવ્યા છે.તો ટેન્કર વડે પાણી પહોંચાડવાના ભાવમાં પણ વધારો કરાયો છે.જેમાં 3000 લીટરના ભાવ 200 થી વધારી 600 અને 10000 લીટરના ભાવ 350 થી વધારી 850 કરવામાં આવ્યા છે. 

કોંગ્રેસે આ ચાર્જ વધારાનો વિરોધ કર્યો હતો. જોકે શાસક પક્ષ દ્વારા દરખાસ્ત પર વોટીંગ કરતા કોંગ્રેસની હાર થઇ હતી જેથી કોંગ્રેસ દ્વારા સામાન્ય સભામાં દરખાસ્તના કાગળો ફાડી મેયરના ડેક્સ પર ફેંકી ભાજપ વિરોધી નારેબાજી કરી હતી. કોંગ્રેસે આરોપ લગાવ્યો હતો કે પાલિકાની તિજોરી ખાલી થતાં ભાવ વધારો કરાયો છે.

આ અંગે પાલિકાના સ્થાયી સમિતિ અધ્યક્ષે કોંગ્રેસના વિરોધ અંગે જણાવ્યું હતું કે ચાર્જમાં વધારોએ લોકોએ આપવો પડશે જે નવું કનેક્શન લેવાના છે જુના કનેકશનોને કોઈ અસર નહીં થાય સાથે લાંબા સમય થી ભાવ વધારો નહીં કરતા બોજો વધતા માપસરનો ચાર્જ વધારો કરાયો છે.