ગાડીમાં સવાર સંદિગ્ધ પાસે AK 47 હથિયાર હતું ! વલસાડ પોલીસને આવ્યો શંકાસ્પદ કોલ

વલસાડઃ જિલ્લા પોલીસ કંટ્રોલરૂમમાં આવેલા એક ફોને જિલ્લાભરની પોલીસને દોડતી દોડતી કરી દીધી હતી. આજે વલસાડ જિલ્લા પોલીસના કંટ્રોલ રૂમમાં એક વ્યક્તિએ ફોન કરી જણાવ્યુ હતુ કે તેમણે પારડી નજીક શંકાસ્પદ ઝાયલો ગાડી જોઈ હતી. જેમા સંદિગ્ધ વ્યક્તિઓ જોવા મળ્યા હતા.

ગાડીમાં સવાર સંદિગ્ધ પાસે ak 47 બંદૂક જેવુ હથિયાર પણ જોયું હતું. આથી પોલીસે ગંભીરતાથી લઈને જિલ્લાભરમાં નાકાબંધી કરી દીધી હતી. શંકાસ્પદ ઝાયલો ગાડીને શોધવા માટે જિલ્લાભરની પોલીસ દોડતી થઈ ગઈ હતી. જિલ્લાના મહત્વના રસ્તાઓ પર પોલીસે ચેકિંગ હાથ ધર્યું હતું.

પોલીસ કંટ્રોલમાં ફોન કરનાર વ્યક્તિએ શંકાસ્પદ ગાડી દમણ તરફ ગઈ હોવાનું જણાવતા દમણ પોલીસને પણ જાણ કરવામાં આવી હતી. આથી વાપી અને દમણ પોલીસે પણ સધન ચેકિંગ હાથ ધર્યું હતુ.

હાઇવે પરથી પસાર થતા વાહનો પર નજર રાખવા માટે હાઇવે પર પણ પોલીસ ટીમ ખડકી દેવામાં આવી હતી. જિલ્લાભરમાં પોલીસનું પેટ્રોલિંગ વધારી દેવામાં આવ્યું હતું. જોકે હજુ સુધી પોલીસને કઇ મળ્યું નથી.