અમદાવાદ: Z સિક્યોરિટી ધરાવતાં VHP ના આંતરરાષ્ટ્રીય કાર્યાધ્યક્ષ પ્રવીણ તોગડિયા ગત મોડી રાતથી જ ગાયબ છે. જેને લઈને VHPના કાર્યકર્તાઓ રસ્તા પર ઉતરી આવ્યા છે. રાજસ્થાન પોલીસ તોગડિયાની અટકાયત કરી અજ્ઞાત સ્થળે લઈ ગઈ હોવાની પણ ચર્ચા છે ત્યારે આ સમગ્ર મામલે ક્રાઈમ બ્રાન્ચે પત્રકાર પરિષદ યોજી સ્પષ્ટતા કરી છે.
ક્રાઈમ બ્રાન્ચ જેસીપીના જણાવ્યા પ્રમાણે રાજસ્થાનમાં પ્રવીણ તોગડિયા સામે ફરિયાદ નોંધાઈ હતી. જે બાદ રાજસ્થાન પોલીસે પ્રવીણ તોગડિયાની ધરપકડ માટે અમદાવાદની સોલા પોલીસની મદદ માગી હતી. જે બાદ પોલીસ તોગડિયાના ઘરે પહોંચી હતી પરંતુ તોગડિયા નિવાસ સ્થાને ન મળતા રાજસ્થાન પોલીસ પરત ફરી હતી. રાજસ્થાન પોલીસે પ્રવીણ તોગડિયાની ધરપકડ કરી નથી.
આ સાથે જ જેસીપીએ જણાવ્યું હતું કે પ્રવણ તોગડિયા સવારે 10.30 કલાકે પોતાના નિવાસ સ્થાનેથી નિકળ્યા હતા. જે બાદ મોડી રાત્રે તેઓ VHPમા કાર્યાલય ખાતે પહોંચ્યા હતા. જ્યાંથી તોગડિયા પોતાના સિક્યોરિટી ગાર્ડને અડધો કલાકનું કહી રીક્ષામાં બેસીને બહાર ગયા હતા. તોગડિયા પોતાના કાર્યાલયથી એક દાઢીવાળા માણસ સાથે ગયા હોલાનું જાણવા મળી રહ્યું છે. જેથી પોલીસ દ્વારા હાલ CCTV કેમેરાની પણ તપાસ કરવામાં આવી રહી છે.
ક્રાઈમ બ્રાન્ચ જેસીપીના જણાવ્યા પ્રમાણે હાલ તોગડિયાની શોધખોળ માટે સ્પેશિયલ ટીમ બનાવાઈ છે. લોકોએ જરા પણ ચિંતા કરવાની જરૂર નથી. જોકે આ મામલે VHP દ્વારા હજૂ સુધી કોઈ ફરિયાદ પણ નોંધાવવામાં આવી નથી.