ક્રિકેટના સટ્ટામાં હાર થતાં ચોરીના રવાડે ચડેલ 2 શખ્સો પોલીસ સકંજામાં

સુરેન્દ્રનગર જિલ્લો જાણે ગુન્હાખોરીનું હબ બની ગયો હોય તેમ લાગી રહ્યું છે. લૂંટ હત્યા ફાયરિંગ જૂથ અથડામણ ચોરી જેવા અનેક બનાવો સામાન્ય બની ગયા છે.ત્યારે લીંબડી પોલીસે હાઇવે પરથી સોનાના દાગીનાની ચીલ ઝડપ કરનાર બે આરોપીઓને પોલીસે દબોચી લેતા લીંબડી સહીત અનેક જિલ્લામાં ચીલઝડપના ભેદો ખુલ્યા હતા.

આ ઘટનાની મળતી વિગત અનુસાર સુરેન્દ્રનગરના લીંબડી ખાતે વીપુલ સોસાયટીમાં રહેતા સિનિયર સીટીઝન વિલાસબેન તથા તેમના પતિ થોડા દિવસ પહેલા સાંજના સમયે વોકિંગમાં નિકળ્યા હતા તે દરમિયાન બે અજાણ્યા શખ્સો મહિલાના ગળામાંથી 10 ગ્રામ સોનાનો ચેઇનને ઝૂટવી લૂંટ કરીને નાસી ગયા હતા.

જે અંગે ભોગ બનનાર મહિલાના પતિ જયંતીલાલ ત્રિભોવનદાસ શાહ એ લીંબડી પોલીસ મથકે લૂંટ અંગેની ફરિયાદ નોંધાવી હતી. જેને આધારે જિલ્લા પોલીસવડાની સૂચનાથી પોલીસે અલગ-અલગ ટીમો બનાવી તપાસ હાથધરી હતી અને બાતમીના આધારે લીંબડી ઊંટડી પુલ ઉપરથી આરોપીઓ યુનુસ ઈસાભાઈ રાધાનપરા ઘાંચી ઉંમર વર્ષ 44 રહેવાસી-શિહોર જિલ્લો ભાવનગર તથા રસુલ મહેબૂબભાઈ સૈયદ ઘાંચી ઉંમર વર્ષ 35 રહેવાસી-શિહોર જિલ્લો ભાવનગર વાળાને મુદામાલ સાથે ઝડપી પાડ્યા હતા અને પુછપરછ હાથ ધરી હતી.

ઉલ્લેખનીય છે કે આરોપીઓ પાસેથી સોનાનો ચેઇન અને બાઈક સહિત કૂલ રૂપિયા 40000 /- નો મુદામાલ પણ જપ્ત કરવામાં આવ્યો હતો. જયારે આરોપી યુનુસ રાધાનપરાએ અગાઉ રાજકોટ ભાવનગર અમરેલી સાવરકુંડલા સહિતના શહેરોમાં અંદાજે 17 જેટલા ચેઇન સ્નેચિંગના ગુન્હાઓમાં તેમજ આરોપી રસુલ સૈયદ ઘાંચીએ પણ મહુવા ખાતે પશુ ચોરીના ગુન્હાઓમાં ઝડપાયેલ હોવાનું બહાર આવ્યું હતું.ક્રિકેટના સટ્ટામાં હારી જવાથી દેણું થઇ જતા બંને ચોરીના રવાડે ચડ્યા હોવાનું પણ આરોપીઓએ જણાવ્યું હતું.