સની લિયોનીની કોન્ડોમ એડ 'નવરાત્રીએ રમો પરંતુ પ્રેમથી'એ સુરતમાં સર્જ્યો વિવાદ

સુરતઃ અભિનેત્રી સની લિયોનીના પોસ્ટરને લઇ ગુજરાતમાં વિરોધ ઉભો થયો છે. એક કોન્ડમની જાહેરાતને નવરાત્રી-ગરબા સાથે જોડી સુરત સહિત ગુજરાતમાં બેનરો લગાવવામાં આવ્યા હતા. આ જાહેરાતમાં એક કોન્ડમ કંપની દ્વારા નવરાત્રીના દરમિયાન કોન્ડોમ કેમ્પેન ચલાવવા સુરત વડોદરા અમદાવાદ અને રાજકોટ સહિત ભારતભરમાં કોન્ડમની એડના બેનરો લગાવ્યા હતા.

જેમાં તેમણે લખ્યું કે 'આ નવરાત્રીએ રમો પરંતુ પ્રેમથી' જેને લઇ વિવાદ સર્જાયો છે. નવરાત્રી-માં અંબેના પાવન તહેવારને સેક્સ સાથે જોડી આવી કોન્ડોમની જાહેરાતના બેનરો લગાવાતા યુવાનોમાં આક્રોશ ફેલાયો હતો અને સોશિયલ મીડિયામાં ભારે વિરોધ કરાયો હતો.

લોકો દ્વારા જ્યારે આ કોન્ડોમ જાહેરાતના બેનરોનો વિરોધ કરાયો હતો ત્યારે 15 જેટલા પોલીસ અધિકારીઓ જાહેરાતની સુરક્ષા માટે ઉભા રાખવામાં આવ્યા હતા. બાદમાં આ જાહેરાતના બેનરોને ઉતારવામાં આવ્યા હતા.

હિંદુ જાગરણ સમિતિ દ્વારા વડોદરા ખાતેના એડવર્ટાઇઝમેન્ટ એજન્સીને બેનરોની હોળી કરવાની ચીમકી આપી હતી. જ્યારબાદ તેઓએ મોડી સોમવારે સાંજે વાસણા રોડ પર લગાવેલાં બેનરો ઉતારાવી લીધાં હતાં.

જો કે હજુ સુરત ખાતે 30થી વધુ અને અમદાવાદમાં પણ મોટી સંખ્યામાં બેનરો લાગ્યાં છે. હિંદુ જાગરણ સમિતિના આગેવાનોએ જણાવ્યું હતું કે જો અન્ય શહેરોનાં બેનરો આવતીકાલ સુધીમાં નહીં ઉતરે તો અમે સ્થળ પર જઇને બેનરોની હોળી કરીશું.