રાજકોટ: સૌરાષ્ટ્ર પંથકમાં ચોમાસાએ દેખા દિધા છે. રાજકોટ સહિત સૌરાષ્ટ્રના વિસ્તારમાં વરસાદી ઝાપટા પડ્યા. ચોટીલામાં એક કલાકમાં 3 ઇંચ વરસાદ ખાબક્યો છે. દક્ષિણ ગુજરાતના તાપી જિલ્લાના સોનગઢના જંગલ વિસ્તારમાં બે કલાકમાં ૧ ઈંચ જ્યારે સુરતના ઉમરાપાડામાં પોણો ઈંચ વરસાદ નોંધાયો હતો.
ચોટીલામાં આજે સાંજના સમયે અચાનક વાતાવરણમાં પલટો જોવા મળ્યો હતો. માત્ર એક કલાકમાં ત્રણ ઈંચ વરસાદ પડયો હતો. વરસાદને લીધે ચોટીલાના અનેક નીચાણવાળા વિસ્તારોમાં પાણી ભરાઇ ગયા હતા. રાજકોટમાં સતત ત્રીજા દિવસે બપોર બાદ મેઘાવી માહોલ વચ્ચે ઝાપટાં પડયા હતા.
રાજકોટ જિલ્લામાં આજે જેતપુર કોટડા સાંગાણીમાં ૧ ઈંચ જ્યારે ધોરાજી-જામકંડોરણામાં અડધો ઈંચ વરસાદ પડયો હતો. જેતપુરમાં વિજળી પણ પડી હતી. સદ્નસિબે કોઇ જાનહાની થઇ નહોતી. જામનગરમાં આજે દિવસ દરમિયાન ઉકળાટ બાદ સાંજે અડધો ઈંચ વરસાદ પડયો હતો. જૂનાગઢમાં પણ હળવા ઝાપટાં પડયા હતા.
બીજી તરફ દક્ષિણ ગુજરાતમાં તાપી જિલ્લામાં બપોર બાદ ગાજવીજ સાથે વાવાછોડું શરૃ થયું હતું. સોનગઢ તાલુકામાં બપોરે બે કલાકમાં ૧ ઈંચ વરસાદ પડયો હતો. ડાંગ જિલ્લામાં આજે સવારે વાદળછાયું વાતાવરણ રહ્યા બાદ બપોરે એકાએક વિજળીના કડાકાભડાકા સાથે સાપુતારા સહિત તળેટી વિસ્તારમાં વરસાદ પડયો હતો.
આહવા તાલુકાના કેટલાક ગામમાં પણ ભારે પવન સાથે વરસાદ તૂટી પડયો હતો. દક્ષિણ ગુજરાતના અરબ સાગર પર લો પ્રેશર સિસ્ટમ બનતા આગામી બે-ત્રણ દિવસમાં સુરત જિલ્લામાં મેઘરાજાની વિધિવત્ પધરામણી થવાના સંકેત હવામાન વિભાગે આપ્યા છે.