સાબરકાંઠા: અરવલ્લીમાં ટ્રક અને ટ્રેકટર વચ્ચે થયેલા અકસ્માતમાં 2 મહિલા સહિત કુલ 6 લોકોના મોત થયા છે. જયારે 13 વ્યક્તિઓ ઇજાગ્રસ્ત છે. તમામ મૃતકો ઝાલોદના કાદવાડ ગામના રહેવાસી છે. તમામ લોકો ટ્રેકટરમાં ખેતરમાં મજૂરી કામ કરવા પાટણ તરફ ટ્રેકટરમાં જતા હતા. તે દરમિયાન ટ્રક સાથે અકસ્માત થયો હતો.
આ ઘટનાને લઇને માલપુર પોલીસે તપાસ હાથ ધરી છે. તો ઇજાગ્રસ્તોને 108 એમ્બ્યુલન્સની મદદથી માલપુર અને મોડાસામાં ખસેડાયા છે.
અકસ્માત એટલો વિચિત્ર હતો કે ટ્રકે ટ્રેક્ટર ને અડફેટે લીધા બાદ ટ્રેક્ટર 50 થી 60 ફુટ સુધી ઢસડાયું હતું. બાજુમાં આવેલ એક દુકાન અને એક કાચા મકાન નો ભુક્કો બોલાઈ ગયો હતો. ઘટના ની જાણ થતા માલપુર પોલીસ તેમજ જિલ્લા પોલીસ તંત્ર ઘટના સ્થળે દોડી આવ્યું હતું અને યુદ્ધ ના ધોરણે કામગીરી હાથ ધરી હતી.