મેઘ મહેર શેરબજાર પર ભારી સ્ટોક એક્સ્ચેન્જિસના ટ્રેડિંગ વોલ્યુમમાં ઘટાડો

2005 પછી પડેલા સૌથી વધુ વરસાદમાં ભારતની આર્થિક રાજધાની ગણાતી મુંબઇ ભારે વરસાદને પગલે મંગળ અને બુધવારે થંભી ગઈ હતી. મુંબઈમાં ઓફિસો વહેલી બંધ થવાથી સ્ટોક એક્સ્ચેન્જિસના ટ્રેડિંગ વોલ્યુમમાં મંગળવારે નોંધપાત્ર ઘટાડો નોંધાયો હતો. મુંબઈમાં તાજેતરમા પડેલ સૌથી વધુ વરસાદને કારણે મંગળવારે નિફ્ટી-50નું ટ્રેડિંગ વોલ્યુમ ત્રણ મહિનાની સરેરાશ કરતાં 13.56 ટકા અને ચાલુ મહિનાની દૈનિક સરેરાશ 4 ટકા નીચું રહ્યું હતું. બજાર નિષ્ણાતોના મત અનુસાર બુધવારે પણ વોલ્યુમ નીચું રહ્યું હતું. કારણ કે ઘણા લોકોએ ઓફિસ જવાનું ટાળ્યું હતું. ઘણા મોટા બ્રોકર્સે સેન્ટ્રલ મુંબઈ ખાતેની ઓફિસ બંધ રાખી હતી.

મંગળવારે BSE પર રૂ. ૩ ૬૯૫.૭૧ કરોડનું ટર્નઓવર થયું હતું જે બુધવારે ઘટીને રૂ. ૨ ૪૭૮.૭૨ કરોડનું થયું હતું. એ જ પ્રમાણે મંગળવારે ૨૧ ૮૨ ૦૧ ૯૬૨ શેર કોન્ટ્રાક્ટ થયા હતા જે ગઇ કાલે ઘટીને ૧૯ ૮૧ ૭૫ ૯૬૦ થયા હતા.

શેરબજારના નિષ્ણાતોના જણાવ્યા પ્રમાણે વરસાદના કારણે કામકાજ ઉપર અસર જોવાઇ છે. નેશનલ સ્ટોક એક્સચેન્જ ઉપર પણ કેશ માર્કેટના વોલ્યુમમાં ઘટાડો નોંધાયો છે. મંગળવારે રૂ. ૨૩ ૭૦૨ કરોડની સરખામણીએ બુધવારે ઘટીને રૂ. ૨૩ ૨૬૯ કરોડનું વોલ્યુમ જોવા મળ્યું છે.

ઉલ્લેખનીય છે કે હવામાન ખાતાએ બુધવારે મુંબઈ સહિત અન્ય રાજ્યોમા પણ ‘ભારેથી અતિભારે વરસાદ’ની આગાહી કરી છે. 2005માં 26-27 જુલાઈએ એક દિવસમાં 944 મીમી વરસાદ પડ્યો ત્યારે પણ એક્સ્ચેન્જિસના ટ્રેડિંગ વોલ્યુમમાં ઘટાડો નોંધાયો હતો. ટ્રેડિંગ વોલ્યુમ 27 જુલાઈએ સામાન્ય કરતાં 30 ટકા ઘટ્યું હતું.