રણબીરનો નવો પ્રેમ છે પાકિસ્તાની અભિનેત્રી માહિરા ખાન!

મુંબઇ: રણબીર કપૂર પાકિસ્તાની અભિનેત્રી માહિરા ખાનને ડેટ કરી રહ્યો છે આ વાતનું સબૂત મળી ગયું છે. બોલીવુડનો સ્ટાર રણબીર કપૂર અને પાકિસ્તાની અભિનેત્રી માહિરા ખાનનો ફોટો સોશિયલ મીડિયા પર વાયરલ થઇ રહ્યો છે. સૂત્રોનું માનીએ તો આ ફોટો એ સમયનો છે જ્યારે રણબીર કપૂર જુલાઇમાં સંજય દત્તની બાયોપિકના શૂટિંગ વખતે ન્યૂયોર્ક ગયો હતો. આ બંને એકબીજાને ડેટ કરી રહ્યા છે એનું આ પાક્કુ સબૂત છે. 

અગાઉ રણબીર કપૂરનું નામ યહ જવાની હૈ દિવાની વખતે દીપિકા પાદુકોણ અને ત્યારબાદ કેટરિના કૈફ સાથે બોલાતું હતું. કેટરિના સાથે તો એ પાંચેક વર્ષ લીવ ઇન રિલેશનશીપમાં એક ફ્લેટમાં સાથે રહ્યો હતો. ૨૦૧૬ના આરંભમાં એનો કેટરિના સાથે બ્રેકપ થયો અને ત્યારબાદ પણ નવી દિલ્હીની એક મહિલા સાથે એનું નામ ચર્ચાયું હતું. 

હવે એનું નામ થોડા સમયથી માહિરા ખાન સાથે બોલાતું થયું છે. માહિરા ડાઇવોર્સી છે અને એક બાળકની માતા છે. એણે શાહરુખ ખાનની ફિલ્મ રઇસ કરી ત્યારબાદ રણબીરના સંપર્કમાં આવી હતી. થોડા સમય અગાઉ એમની વાતો ઊડી ત્યારે બંનેએ કહ્યું હતું કે અમે તો માત્ર દોસ્તો છીએ. પરંતુ હાલ સોશ્યલ મિડિયા પર વાઇરલ થયેલા ફોટોગ્રાફ્સ પરથી એવું લાગે છે કે બંને વચ્ચે દોસ્તી કરતાં કંઇક વધુ છે.  ન્યૂયોર્કની સડકો પર બંને એક સાથે સિગારેટ ફૂંકતાં દેખાયાં હતાં એવી થોડીક તસવીરો વાઇરલ થઇ છે.