એડવેન્ચરની શોખિન પૂણેની શીતલ રાહે મહાજને થાઇલેન્ડમાં સોમવારે રંગીન સાડી પહેરીને સ્કાઇડાઇવિંગ કરનારી પહેલી ભારતીય મહિલા બનીને રેકોર્ડ પોતાના નામે કર્યો. સ્કાઈ ડાઈવિંગ કર્યા બાદ શીતલે કહ્યું કે વાતાવરણ અનુકૂળ હોવાને કારણે તેને કોઈ સમસ્યાનો સામનો કરવો પડ્યો નહોતો. તેણે પ્રસિદ્ધ ટૂરિઝમ પ્લેસ રિઝોર્ટ પટ્ટાયા પરથી એક વિમાનમાંથી 2 વખત લગભગ 13 હજાર ફૂટ ઉંચેથી છલાંગ લગાવી.
શીતલે જણાવ્યું કે ‘હું આગામી મહિને આવી રહેલા ઈન્ટરનેશનલ વુમેન્સ ડે પર કંઈક અલગ કરવા માગતી હતી. એટલે મેં મારા સ્કાઈ ડાઈવિંગ માટે નૌવારી સાડી પહેરવાનો નિર્ણય લીધો.’ તેણે પોતાનો અનુભવ શેર કરતા કહ્યું કે આ સાડી લગભગ 8.25 મીટર લાંબી છે જે સામાન્ય ભારતીય સાડીઓથી ઘણી લાંબી છે. જણાવી દઈએ કે નૌવારી સાડી મહારાષ્ટ્રમાં ખાસ પ્રકારને પહેરાતી સાડી છે. તેણે કહ્યું કે ‘સાડી પહેરવી તેના ઉપર પેરાશૂટ પહેરવું સેફ્ટી ગિયર કોમ્યુનિકેશન ટૂલ્સ ચશ્મા જૂતા વગેરે પહેરવાથી સ્કાઈ ડાઈવિંગ ઘણું પડકારજનક બની ગયું.’
તેમણે માન્યુ કે સાડીની સાથે સ્કાઇડાઇવિંગ કરવા માટે પહેલા કરતાં વધારે તૈયારી કરવાની જરૂર પડી. ઘણી જગ્યાએ પિન લગાવી ઘણી જગ્યાએ સાડી ફિટ બાંધી કેમ કે સાડીની સાથે થાઇલેન્ડની આ હવામાં સ્કાઇડાઇવિંગ કરવાનું હતુ. શીતલે કહ્યુ કે દેશમાં મહિલાઓ વિભિન્ન પ્રકારની સાડી પહેરે છે પરંતુ મહારાષ્ટ્રની નૌવરી સાડી પહેરવી અને સંભાળવી ખૂબ જ મુશ્કેલ રહે છે.
35 વર્ષીય શીતલે કહ્યું કે ‘હું એ સાબિત કરવા માગતી હતી કે મહિલાઓ ન માત્ર સામાન્ય દિનચર્યા દરમિયાન આ સાડી પહેરી શકે છે પણ સ્કાઈડાઈવિંગ જેવા જોખમભર્યા એડવેન્ચર પણ કરી શકે છે.’
પદ્મશ્રી અને બે જુડવા બાળકોની માતા શીતલ રાણે મહાજને અત્યાર સુધી 18 રાષ્ટ્રીય સ્તરના સ્કાઈડાઈવિંગ રેકોર્ડ સ્થાપિત કરી ચૂકી છે. આ ઉપરાંત તેના નામે છ ઈન્ટરનેશનલ રેકોર્ડ આખા વિશ્વમાં 704 જમ્પ લગાવવાનો રેકોર્ડ છે. તેના નામે ઘણા નેશનલ અને ઈન્ટરનેશનલ એવોર્ડ્ઝ પણ મળી ચૂક્યા છે.