મુંબઇ: બોલીવુડની ટોચની અભિનેત્રી અને ગાયિકા પ્રિયંકા ચોપરા આ વર્ષે એમી એવોર્ડઝ્ એનાયત કરવા અતિથિ વિશેષ તરીકે હાજરી આપવાની હોવાની ઔપચારિક જાહેરાત કરાઇ હતી. અગાઉ ખુદ પ્રિયંકા પોતાના એક આલ્બમ માટે આ એવોર્ડ જીતી ચૂકી હતી. હવે એ પોતાના હાથે એવોર્ડ એનાયત કરવાની છે.
રવિવારે ૧૭ની સપ્ટેમ્બરે કેલિફોર્નિયાના લોસ એંજલ્સ શહેરના ડાઉનટાઉન વિસ્તારમાં આવેલા માઇક્રોસોફ્ટ થિયેટરમાં ૬૯ મો એવોર્ડ સમારોહ યોજાવાનો છે. આ પ્રસંગે હોલિવુડના ટોચના કલાકારો રીઝ વીધરસ્પૂન નિકોલ કીડમેન એડમ સ્કોટ વિયોલા ડેવિસ જેન ફોન્ડા લીલી ટોમ્લીન સેઠ મેયર્સ અને ડોલી પાર્ટન પણ પ્રિયંકા સાથે સ્ટેજ પર હશે અને એવોર્ડ વિતરણમાં સહભાગી થશે એવું એન્ટરટેઇમેન્ટ વીકલીના એેક રિપોર્ટમાં જણાવાયું હતું.
અત્રે એ યાદ કરવા જેવું છે કે ૨૦૧૬ના ઓસ્કાર એવોર્ડ સમારોહમાં પણ હોલિવુડના અન્ય ટોચના કલાકારો સાથે પ્રિયંકા ચોપરાએ એન્કરિંગ કર્યું હતું. એની ક્વોન્ટિકો ટીવી સિરિયલ હિટ નીવડી છે. તાજેતરમાં એણે હોલિવૂડની ઇઝન્ટ ઇટ રોમાન્ટિક ફિલ્મનું શૂટિંગ પૂરું કર્યુ હતું.