ગત વર્ષે ઇરફાન ખાનની ઑપોઝિટ 'હિન્દી મીડિયમ'માં જોવા મળી ચૂકેલી પાકિસ્તાની ફિલ્મ અને ટીવી એક્ટ્રેસ સબા કમર એક ટીવી ઇન્ટરવ્યુ દરમિયાન રડી પડી હતી. એક પાકિસ્તાની હોવાને કારણે એરપોર્ટ પર જે રીતે તેમનું અપમાન કરવામાં આવે છે અને તેમની સાથે કેવો વ્યવહાર કરવામાં આવે છે તે અંગે વાત કરી હતી. પાકિસ્તાની ટીવી ચેનલ APlusમાં આપેલા એક ઇન્ટરવ્યુમાં તેણે આ વાત કહી હતી.
આ વીડિયોમાં સબા કહી રહી છે કે ''આપણે પાકિસ્તાનની ધરતીને પવિત્ર માનીએ છીએ તેના નારા લગાવીએ છીએ. પરંતુ જ્યારે અમે બહારના દેશોમાં જઈએ અને જે રીતે અમારું ચેકિંગ કરવામાં આવે છે તે હું તમને જણાવી શકું તેમ નથી. મને શરમ આવે છે કે ત્યાં એક-એક કરીને અમારા કપડાં ઉતારવામાં આવે છે.''
તેણે ઈન્ટરવ્યુમાં આગળ જણાવ્યું કે ''મને યાદ છે જ્યારે હું શૂટિંગ માટે ભારતીય સાથે વિદેશ ગઈ હતી ત્યારે તે લોકોને સરળતાથી જવામાં દેવાયા પણ મને રોકી લેવાઈ. મને રોકવાનું કારણ મારું પાકિસ્તાની હોવાનું હતું. તે દિવસે મને અહેસાસ થયો કે આ દુનિયા સામે આપણી આટલી જ ઈજ્જત છે.''
આ ઇન્ટવ્યુમાં લાઇવ થતા જ સોશ્યલ મીડિયા પર આ વીડિયો વાયરલ થઇ રહ્યો છે. પાકિસ્તાનના લોકો આ વીડિયોને શેર કરીને લખી રહ્યાં છે કે ''માત્ર સબા જ નહીં તમામ પાકિસ્તાનીઓને શરમનો સામનો કરવો પડી રહ્યો છે. આપણા બાળકોને માખીની જેમ મારી નાખવામાં આવે છે અને હાફિઝ સઈદ જેવા આતંકવાદી ખુલ્લાઆમ ફરી રહ્યાં છે.''
સબા પાકિસ્તાનની ફેમસ એક્ટ્રેસ છે. 'ઉડાન' 'જિનાહ કે નામ' જેવા ટીવી શોમાં જોવા મળી ચૂકેલી સબા 'મંટો' 'લાહોર સે આગે' જેવી ફિલ્મોમાં એક્ટિંગ કરી ચૂકી છે.