પાકિસ્તાનને ફરી આપી ભારતને પરમાણું હથિયારની ધમકી

કરાચીઃ પાકિસ્તાને ફરી એકવાર ભારતને પરમાણું હથિયારની ધમકી આપી છે. પાકિસ્તાનના નવા પ્રધાનમંત્રી શાહિદ અબ્બાસીએ કહ્યું કે ભારતના કોલ્ડ સ્ટાર્ટ ડૉક્ટ્રીન સામે લડવા માટે અમે નાના રેન્જ વાળા પરમાણુ હથિયાર બનાવી લીધા છે. ફોરેન રિલેશન કાઉન્સિલમાં અમેરિકી થિંક ટેન્ક પ્રોગ્રામમાં એક સવાલના જવાબમાં અબ્બાસીએ કહ્યું કે અમારી પાસે પરમાણુ સંપત્તિ સંપૂર્ણ રીતે સુરક્ષિત છે. અમારું પુરુ નિયંત્રણ છે.

અમે એવી સિસ્ટમ અપનાવી છે કે તે સુરક્ષિત રહે. ન્યુક્લિયર કમાન્ડ ઓથોરિટીએ પરમાણુ હથિયારોને સેફ રાખવા માટે સમગ્ર પ્રોસેસ પૂર્ણ કરી છે. મહત્વનું છે કે NCA પાકિસ્તાનમાં પરમાણુ હથિયારોની સુરક્ષાની જવાબદારી નિભાવી રહ્યું છે. 
 
અબ્બાસીએ કહ્યું કે પાકિસ્તાન એક જવાબદાર દેશ છે અમે છેલ્લા 15 વર્ષમાં આતંકવાદ સામે લડાઇ લડીને સાબિત કર્યું છે. તેમણે કહ્યું કે અમારી પાસે ન્યૂક્લિયર તાકાત છે અને અમને ખબર છે કે તેને કેમ સાચવવી જોઇએ.

પાકિસ્તાને અમેરિકાના રાષ્ટ્રપતિ ડોનાલ્ડ ટ્રમ્પ દ્વારા યુદ્ધગ્રસ્ત અફઘાનિસ્તાનમાં ભારત માટે વધારે મોટી ભૂમિકાની વકિલાત કરવાને લઇ અમેરિકાની સામે વાંધો દાખલ કર્યો છે.