મુંબઈમાં ફરીથી મુશળધાર શાળા-કોલેજો બંધ હજુ ભારે વરસાદની આગાહી

મુંબઈઃ મુંબઈમાં ફરી એકવાર આકાશી આફતે મુંબઈકરોને ઘમરોળ્યા છે. ભારે વરસાદના કારણે મુંબઈના લોકોની ફરી એકવાર મુશ્કેલી વધારી દીધી છે. મુશળધાર વરસાદના કારણે કુર્લા સહિતના વિસ્તારોમાં માર્ગો પર પાણી ભરાઈ ગયા હતા. જેના કારણે ભારે ટ્રાફિક જામની સ્થિતિ સર્જાઈ હતી. મુંબઈની લાઈફલાઈન ગણાતી લોકલ ટ્રેન પર પણ વરસાદના કારણે અસર પડી છે.

લોકલ ટ્રેનના કેટલાક રૂટ પર ટ્રેન ધીમી ગતિએ ચાલી રહી છે. તો વેસ્ટર્ન લાઈન પર વસઈથી આગળ લોકલ ટ્રેન નથી જઈ રહી. હવામાન વિભાગે મુંબઈને કાટલાક ભાગોમાં હજુ પણ આગામી 24 કલાકમાં ભારે વરસાદ પડવાની આશંકા વ્યક્ત કરી છે. જેને ધ્યાને રાખીને શહેરની શાળા અને કોલેજોમાં રજા જાહેર કરી દેવામાં આવી છે.

મુંબઈમાં ખરાબ હવામાનના કારણે એરપોર્ટની આસપાસના વિસ્તારોમાં વિઝિબીલીટી ઓછી થઈ જતાં વિમાની સેવાને પણ અસર પહોંચી છે. કેટલીક ફ્લાઈટો ડાયવર્ટ કરવામાં આવી છે. જોકે આ સમયે એક વિમાન લેન્ડિંગ સમયે રનવે પર લપસી ગયું હતું. જે બાદ એરપોર્ટ પર હવાઈ સેવાને થોડા સમય માટે રોકી દેવામાં આવી હતી. મહત્વનું છે કે ગત મહિને 29 ઓગસ્ટે મુંબઈમાં 24 કલાકમાં 13 ઈંચ જેટલો વરસાદ ખાબક્યો હતો.