અમદાવાદઃ એલડી આર્ટસ કોલેજ પાસેના નોલેજ સેન્ટરમાં એનએસએસ દ્વારા મોક પાર્લામેન્ટ યોજાઇ. ગત મનકી બાતમાં પ્રધાનમંત્રી નરેન્દ્ર મોદીએ જિલ્લા વાર મોક પાર્લામેન્ટ થાય અને યુવાઓ સંસદની કામગીરીથી વાકેફ થાય તે માટે આયોજન કરવાનું સુચન કર્યું હતું.
જેના પગલે પ્રથમવાર ગુજરાતમાં અમદાવાદમાં મોક પાર્લામેન્ટનું આયોજન કરાયું હતું. જેમાં અલગ અલગ 24 યુનિવર્સિટીના 300થી વધુ વિદ્યાર્થીઓ ઉપસ્થિત રહ્યાં. સંસદમાં જે પ્રકારે દેશના વિવિધ મુદ્દે ચર્ચા થાય તે રીતે આ મોક પાર્લામેન્ટમાં ચર્ચા થઈ. અહીં પક્ષ અને વિપક્ષના નેતા ઉપરાંત મંત્રીગણની વિવિધ કામગીરી અલગ અલગ વિદ્યાર્થીઓએ નિભાવી હતી.
ખાસ કરીને આ મોક પાર્લામેન્ટમાં એજ્યુકેશન રિલેટેડ સ્ટાર્ટ અપ અંગેનું બિલ રોબોટિક રિલેટેડ બિલ અને યુથ ડેવલપમેન્ટ એમ 3 અલગ અલગ બિલ મુદ્દે ચર્ચા કરવામાં આવી.
મહત્વનું છે કે મોક પાર્લામેન્ટમાં આ યુવા વિદ્યાર્થીઓએ વિવિધ મુદ્દાઓ પર ચર્ચા કરી સાથે સાથે વિપક્ષે અમુક મુદ્દાઓ પર સત્તાપક્ષ સાથે સહમતના થઈ વોક આઉટ પણ કર્યો હતો.