મહેસાણા નગરપાલિકાની મફત સિટીબસ સેવા શરૂ કરવાની જાહેરાતને લઇ સર્જાયો વિવાદ

મહેસાણાઃ નગરપાલિકાએ તાજેતરમાં શહેરમાં મફત સિટીબસ સેવા શરુ કરવાની સાધારણ સભામાં જાહેરાત કરી છે. જોકે મફત સિટીબસ સેવાની જાહેરાતની સાથે વિવાદ સર્જાયો છે. કારણ કે છેલ્લા ૩ વર્ષથી મહેસાણા શહેરમાં સિટીબસ સેવા સંપૂર્ણ બંધ હાલતમાં છે. તેના કારણે શહેરીજનોને મફત સિટીબસ હાસ્યાસ્પદ મુદ્દો બન્યો છે.

જોકે કોંગ્રેસ શાસિત મહેસાણા નગરપાલિકા દ્વારા મફત સિટીબસ સેવા માટે તેમનો અલગ તર્ક છે કે તમામ મિલકતો ઉપર ૮૫ રૂપિયા વેરો વધારી સિટીબસ સેવા મફત આપવામાં આવશે. જોકે મહેસાણા નગરપાલિકા વિસ્તારમાં ૮૦ ૦૦૦થી વધુ મિલકતો આવેલી છે.

ત્યારે ૮૫ રૂપિયા વધારો કરવાથી ૬૮ લાખ રૂપિયાની વધારાની આવક થશે અને વેરા વધારાની આવકથી ૭ સિટીબસો શહેરીજનો દ્વારા બસ સેવા આપવામાં આવશે. પરંતુ અહીં પ્રશ્ન ઉપસ્થિતિ થાય છે કે જે લોકો સિટીબસ સેવાનો લાભ લેવાના નથી એવા શહેરીજનો વધારાનો વેરો શું કામ ચૂકવે.