મહેસાણા: ભાજપની ગૌરવ યાત્રા રાજ્યભરમાં ફરી રહી છેત્યારેઆજે ગૌરવ યાત્રા મહેસાણા જિલ્લામાં આવવાની છે.જેને લઈ ભાજપ દ્વારા તૈયારીઓ કરવામાં આવી છે.મહેસાણામાં ભાજપની ગૌરવ યાત્રા નાયબ મુખ્યમંત્રી નીતિન પટેલની અધ્યક્ષતામાં નીકળવાની છે.
બીજી તરફ જ્યારે મહેસાણામાં ગૌરવ યાત્રા આવી રહી છે ત્યારે વિરોધનો વંટોળ ઉઠવાની શક્યતા જોવામાં આવી રહી છે.તેને જોતો ચુસ્ત સુરક્ષા બંદોબસ્ત ગોઠવવામાં આવ્યો છે. ઉલ્લેખનીય છે કે મહેસાણા રાજકીય લેબોરેટરી કહેવાય છે તો ભાજપનો ગઢ પણ કહેવાય છે.
પરંતુ આ જ જિલ્લામાંથી સરકાર માટે માથાનો દુખાવો બનેલા પાટીદાર આંદોલનની પહેલી આગ ભભૂકી હતી. જિલ્લાના વિસનગરમાં ધારાસભ્ય ઋષિકેશ પટેલનું કાર્યાલય પાટીદારોએ સળગાવ્યું હતું અને પાટીદાર આંદોલનની શરૂઆત થઈ હતી. તો ભાજપનો ગઢ કહેવાતા મહેસાણા છેલ્લા કેટલાક સમયથી ભાજપ માટે આંદોલનનો ગઢ બની ગયું છે. તેથી ભાજપની ગૌરવ યાત્રા માટે મહેસાણામાં કપરા ચઢાણ ચોક્કસ માનવામાં આવી રહ્યા છે. હાલ તો મોટી માત્રામાં પોલીસ કાફલો ખડકી દેવાયો છે.