સુરેન્દ્રનગર: રાજ્યમાં આગામી ડિસેમ્બર મહિનામાં વિધાનસભાની ચૂંટણી યોજાનાર છે ત્યારે ધ્રાંગધ્રા તાલુકાના ચુલી ગામે સમસ્ત કોળી સમાજનું ધ્રાંગધ્રા-હળવદ વિધાનસભા મત વિસ્તારનું મહાસંમેલન યોજાયું હતું. આ વિધાનસભામાં સૌથી વધુ અંદાજે 60000 કરતા પણ વધુ મતદારો કોળી સમાજના છે ત્યારે ભાજપ અને કોંગ્રેસ પક્ષ દ્વારા કોળી સમાજના ઉમેદવારને ટિકિટ આપવામાં આવે તે અંગે ચર્ચા-વિચારણા કરવામાં આવી હતી.
જે પક્ષ કોળી સમાજના ઉમેદવારને ટિકિટ આપશે સમસ્ત કોળી સમાજ તેની સાથે રહેશે તેવું આહવાન પણ કરવામાં આવ્યું હતું. આ તકે ઉપસ્થિત મહાનુભાવો દ્વારા રાજકીય ભેદભાવ ભૂલી કોળી સમાજના ઉમેદવારને જ આ બેઠક પર ટિકિટ મળે તે માટે સૌને સંગઠિત થવા જણાવાયું હતું.
કોઈ પણ રાજકીય પક્ષ દ્વારા આપવામાં આવતી લોભામણી જાહેરાતો કે રૂપિયાની લાલચમાં ન આવી સમસ્ત કોળી સમાજને આગામી વિધાનસભાની ચૂંટણીમાં પોતાની એકતા દેખાડવા અનુરોધ કર્યો હતો. આ તકે કોંગ્રેસ અને ભાજપ પક્ષમાં થી ટિકિટની દાવેદારી કરનાર બંને ઉમેદવારો સહીત જિલ્લા ભરમાંથી કોળી સમાજના રાજકીય હોદેદારો આગેવાનો યુવાનો અને કાર્યકરો મોટી સંખ્યામાં ઉપસ્થિત રહ્યા હતા.