નવી દિલ્હી: પોતાનાં વિવાદી નિવેદનો અને ટ્વિટસ માટે મશહુર અભિનેતા કમાલ ખાન ફરી એકવાર સમાચારોમાં ચમક્યા છે. અભિનેતા કમાલ ખાનનું ઓફિશિયલ ટ્વિટર હેન્ડલ એકાઉન્ટ સસ્પેન્ડ કરવામાં આવ્યું છે. પોતાને સૌથી સારા ફિલ્મ સમીક્ષક માનતા કમાલ ખાન કોઈ પણ ફિલ્મના રિલીઝ પહેલા પોતાનો રિવ્યૂ આપતા હોય છે. જોકે હજુ સુધી તેમનું એકાઉન્ટ કયા કારણસર સસ્પેન્ડ કરવામાં આવ્યું છે તે અંગે સત્તાવાર જાહેરાત કરવામાં આવી નથી.
તાજેતરમાં કમાલ ખાને આમિર ખાનની ફિલ્મ 'સિક્રેટ સુપરસ્ટાર'નો રિવ્યૂ આપ્યો હતો. એક બાજુ લોકો આમિર ખાનની ફિલ્મની પ્રશંસા કરી રહ્યા છે તો બીજી બાજુ કમાલ ખાને આ ફિલ્મને સાવ બેકાર ગણાવી હતી. ટ્વિટર એકાઉન્ટ સસ્પેન્ડ થયા બાદ કમાલ ખાને ફેસબુક પર પોતાની ભડાશ કાઢી હતી અને જણાવ્યું હતું કે તેમણે આ એકાઉન્ટ પર મહેનત કરી હતી અને ત્યારે તેમણે ૬૦ લાખ સમર્થક મળ્યા હતા પરંતુ હવે એવું લાગે છે કે ટ્વિટરને આમિર ખાન ચલાવી રહ્યા છે માટે જ તો તેમણે સરળતાથી તેમનું એકાઉન્ટ બંધ કરાવી દીધું છે. કમાલ ખાને એવું પણ જણાવ્યું છે કે તેમની વેબસાઈટ અને યુ ટ્યૂબ ચેનલ પણ છે તેઓ ત્યાં પણ તેમની ફિલ્મ અંગે બોલશે.
બીજી બાજુ ટ્વિટર પર કેટલાક લોકોએ પોતાની પ્રતિક્રિયા જાહેર કરી છે તો કેટલાકે તેને દિવાળી બેસ્ટ ગિફ્ટ ગણાવી છે. કમાલ ખાને પોતાની બોલિવૂડની કારકિર્દીની શરૂઆત ૨૦૦૮માં આવેલી ફિલ્મ 'દેશદ્રોહી'થી કરી હતી.