જામનગર નજીક ખંભાળીયા ધોરી માર્ગ પર અમુક શખ્સો નકલી પોલીસના સ્વાંગમાં વાહન ચાલકોને લૂંટતા હોવાની જાણકારી મળતા જામનગર LCBની ટીમે દરોડો પડ્યો હતો.જેમાં લાખાબાવળ પાટિયા પાસે બોલેરોમાં પોલીસનું બોર્ડ લગાવીને ત્રણ શખ્સો ટ્રક ચાલકોને રોકી પોલીસ તરીકે ઓળખ આપી રૂપિયા ઉઘરાવતા મળી આવ્યા હતા.
આ મામલે LCBએ જામનગરના જ વિજયસિંહ લાલુભા પ્રકાશ બાલુભાઈ બારોટ અને વિપુલ જયેન્દ્ર ગોસાઈની અટકાયત કરી કાયદેસરની કાર્યવાહી હાથ ધરી હતી.આ ત્રણેય આરોપીઓ છેલ્લા એકાદ માસથી રોડ પર ઉભા રહીને પોલીસ તરીકે ઓળખ આપીને વાહનચાલકો પાસેથી રૂપિયા પડાવતા હોવાનું સામે આવ્યું હતું.
આપને જણાવી દઇએ કે આ ત્રણેય પૈકી વિજયસિંહ વાળા આ અગાઉ મારામારી તથા દારૂ કેસમાં જયારે આરોપી પ્રકાશ બારોટ ૨૫ લાખની બેંક લૂંટ કેસમાં સંડોવાયેલો હોવાના ખુલાસા થયા છે.