ગાંધીનગરઃ ગુજરાત વિધાનસભાની ચૂંટણીને લઇ કોંગ્રેસ-ભાજપ અને અન્ય પક્ષો પોતપોતાના ઉમેદવારોની યાદી જાહેર કરી રહ્યા છે. ભાજપે પોતાની 34 ઉમેદવારોની યાદી જાહેર કરી દીધી છે. જેને લઇ કેટલાક નેતાઓને ટિકિટ ન અપાતા પક્ષથી નારાજ થયા છે.
ભાજપની છેલ્લી યાદી જાહેર થતાની સાથે જ આંતરિક વિખવાદ શરૂ થઇ ગયો. સાણંદ બેઠક પર ભાજપમાં આંતરિક વિખવાદ થયો હોવાનું સામે આવ્યું છે. કમાભાઇ રાઠોડ અપક્ષમાંથી ઉમેદવારી નોંધાવશે. ભાજપમાંથી ટિકિટ ન મળતા કમાભાઇ રાઠોડ અપક્ષમાંથી ઉમેદવારી નોંધાવશે. ભાજપે કમા રાઠોડની બદલે કરમશીના પુત્રને ટિકિટ આપી છે.
વડોદરાના વાઘોડીયામાં મધુભાઈ શ્રીવાસ્તવનું નામ જાહેર થતા ભાજપમાં ભડકો જોવા મળ્યો. વાઘોડીયા બેઠકના પ્રબળ દાવેદાર ભાજપના ધર્મેન્દ્રસિંહ વાઘેલા અપક્ષ તરીકે ઉમેદવારી નોંધવાશે. કાર્યકર્તાઓ સાથે ધર્મેન્દ્રસિંહ વાઘેલા જંગી રેલી કાઢશે અને ફોર્મ ભરશે.
ખેડાની મહુધા બેઠક પર ભાજપના ઉમેદવાર ભરતસિંહ પરમારનો વિરોધ કરાયો હતો. ભાજપમાંથી ટિકિટ માંગનાર સુરેશ વાઘેલાએ ભરતસિંહનો વિરોધ કર્યો હતો. હવે સુરેશ વાઘેલા મહુધા બેઠક પરથી અપક્ષ ઉમેદવારી નોંધાવશે.
ખેડા જિલ્લાની વધુ એક બેઠક પર ભાજપમાં ભડકો થયો છે. કપડવંજમાં ભાજપે કનુ ડાભીને ટિકિટ આપતા વિરોધ થયો છે. ભાજપના પૂર્વ ધારાસભ્ય બિમલ શાહ અપક્ષ ઉમેદવારી નોંધાવશે.