વલસાડઃ વલસાડના લોકોમાં જાણે માનવતા મરી પરવારી હોય તેવી એક ઘટના પ્રકાશમાં આવી છે. વલસાડના તિથલ રોડ પર આવેલી ગર્વર્મેન્ટ કોલોની પાસે એક અજાણી મહિલાનો મૃતદેહ કલાકો સુધી રઝળતો રહ્યો. સતત ધમધમતા રસ્તા પર પડેલા આ મૃતદેહ તરફ સૌ કોઇ લોકોએ આંખ આડા કાન કર્યા વાહન ચાલકો કે રાહદોરીઓએ પોલીસને જાણ કરવાની તસ્દી પણ ન લીધી.
મહત્વનું છે કે આ વિસ્તારમાં મોટા સરકારી અધિકારીઓના નિવાસસ્થાન પણ આવેલા છે છતાં પણ કલાકો સુધી મહિલાના મોતનો મલાજો જાળવ્યો ન હતો. આખરે કલાકો બાદ એક રાહદારીએ પોલીસને જાણ કરી અને પોલીસે ઘટના સ્થળે પહોંચી મૃતદેહની તપાસ કરી હતી. મૃતક મહિલા વલસાડના કોસંબાની હોવાની વિગત સામે આવી છે. જો કે મહિલાના મોતનું સાચુ કારણ હજુ જાણી શકાયું નથી.