દક્ષિણ આફ્રિકાની ભૂમિ પર 25 વર્ષ પછી ઇતિહાસ બનાવવાનું સ્વપ્ન જોઈ રહેલી ભારતીય ક્રિકેટની ટીમની આશા પર પાણી ફરી રહ્યું છે. કેપ ટાઉનમાં રમાયેલી ત્રણ ટેસ્ટ મેચની શ્રેણીની પ્રથમ મેચમાં વિરાટ બ્રિગેડને 72 રનથી હારનો સામનો કરવો પડ્યો હતો. જે ભારતીય ટીમ માટે એક મોટો ફટકો પડ્યો હોય એવું કહી શકાય.
દક્ષિણ આફ્રિકા હવે 1-0થી ટેસ્ટ શ્રેણીમાં આગળ છે અને અહીંથી ટીમ ઈન્ડિયા માટે પલટ વાર કરવું એટલું સરળ નથી. ટીમ ઇન્ડિયા માટે કેપ ટાઉનમાં વિજય બનવાની સુવર્ણ તક હતી પરંતુ બેટ્સમેનોની નિરાશાજનક પ્રદર્શનને કારણે તેઓ ન્યૂલેન્ડ્સના મૈદાન પર પ્રથમ જીત મેળવી શક્યા નહીં.
આવું પ્રદર્શન જોયા બાદ ટીમ ઈન્ડિયા પર ઘણા પ્રશ્નો ઉઠાવવામાં આવી રહ્યા છે જેમકે દક્ષિણ આફ્રિકાના બોલરોની સામે રમવા માટે આપણા ખેલાડીઓ તૈયાર હતા કે પછી ટીમ ભૂલી ગઈ છે કે અહીં આપણે 25 વર્ષમાં કુલ 2 મેચ જ જીત્યા છે.
આફ્રિકાના આ મુશ્કેલ પ્રવાસ પહેલા ટીમ ઇન્ડિયાને બે દિવસના પ્રેક્ટિસ મેચ રમવાની તક મળી હતી જે પછી રદ્દ કરવામાં આવી હતી. ત્યારબાદ ભારતીય ટીમ મેનેજમેન્ટે એવી દલીલ કરી હતી કે પ્રેક્ટિસ મેચની જગ્યાએ નેટ પ્રેકટીસ ટીમ માટે વધારે ફાયદાકારક રહેશે.
ટેસ્ટ સિરીઝ પહેલા ભારતીય ખેલાડીઓની પ્રેક્ટિસ કરતાં વધુ તો શોપિંગ અને મુસાફરી હેડલાઇન્સમાં હતી. આ ટીમ ઇન્ડિયા માટે વધારે ખર્ચાળ સાબિત થયું છે.
1922-23 પછી કોઈ પણ મેહમાન ટીમ દક્ષિણ આફ્રિકાની સામે ટેસ્ટ સિરીઝ જીતી શકી નથી. 1922-23 વર્ષમાં પ્રથમ ટેસ્ટ મેચ હારી હોવા છતાં ઇંગ્લેન્ડની ટીમે પાંચ મેચની ટેસ્ટ શ્રેણી 2-1 જીતી લીધી.