મહેસાણા પ્રવેશ સંદર્ભે હાર્દિક પટેલે કરી હાઈકોર્ટમાં અરજી

પાસના કન્વીનર હાર્દિક પટેલે મહેસાણામાં પ્રવેશ પર લાગેલી રોકને હટાવવાની માગ સાથે હાઈકોર્ટમાં અરજી કરી છે. આ અરજી સંદર્ભે રાજ્ય સરકારે જવાબ રજૂ કરવા માટે સમય માગ્યો છે. આ અરજી પરની વધુ સુનાવણી આવતા સપ્તાહે હાથ ધરાશે. હાર્દિકના વકીલની હાઈકોર્ટમાં રજૂઆત હતી કે મહેસાણામાં હાર્દિક પટેલના પ્રવેશ પર હાઈકોર્ટે જે રોક લગાવી છે એ શરતમાંથી તેને મુક્ત કરવામાં આવે.

હાર્દિક પટેલને વિવિધ સભા-સંમેલન બેઠકો આંદોલનના કામ માટે અને સગા સંબંધીઓને મળવા માટે વારંવાર મહેસાણામાં જવા માટે સંજોગો સર્જાય છે તેથી મહેસાણામાં પ્રવેશ માટે મંજૂરી આપવામાં આવે. મહત્વનુ છે કે મહેસાણાના ધારાસભ્યની ઓફિસની તોડફોડના કેસમાં હાઈકોર્ટે હાર્દિક પટેલના શરતી જામીન મંજૂર કર્યા હતા જેમાં શરત છે કે આ કેસની ટ્રાયલ પૂર્ણ થાય નહીં ત્યાં સુધી હાર્દિકે મહેસાણામાં કોર્ટની મંજૂરી વગર પ્રવેશ કરવો નહીં.