BJP 60 બેઠકોમાં જ સંકેલાય જશે તેનાથી એક પણ બેઠક વધુ આવશે તો હું જેલ જવા તૈયારઃ હાર્દિક

માણસાઃ ગુજરાત વિધાનસભાની ચૂંટણી નજીક આવી રહી છે ત્યારે ભાજપે પ્રથમ અને બીજી યાદીમાં કુલ 106 ઉમેદવારોને જાહેર કરીને નવી જ ચાલ ચાલી લીધી છે. તેવામાં પાસ નેતા હાર્દિક પટેલે ગાંધીનગરના માણસામાં સભા યોજી હતી.

જેમાં મોટી સંખ્યામાં જનમેદની ઉમટી હતી. મહત્વનું છે કે હાર્દિક પટેલના નામે કથિત વીડિયો વાયરલ થયા હતા. પરંતુ તેને ધ્યાનમાં ન લઇ હાર્દિક પટેલની અનામતની લડાઇમાં લાખોની સંખ્યામાં સમર્થકો ઉમટ્યા હતા.

આ સભા સંબોધતા હાર્દિક પટેલે ભાજપ પર પ્રહાર કરતા કહ્યું કે ગુજરાતની પ્રજા 22 વર્ષના વિકાસની સીડી જોવા માંગે છે સેક્સની સીડીઓ નથી જોવા માંગતી. એક સમય હતો જ્યારે સંજય જોષીને બદનામ કરવામાં આવ્યા હતા. જ્યારે હવે મને અને સમાજને બદાન કરવામાં આવી રહ્યો છે. 

વધુમાં હાર્દિકે કહ્યું કે ભાજપને રાજકારણ બરોબર રમતા નથી આવડતું તેમણે આ સીડીઓ ચૂંટણીના 2-3 દિવસો પહેલા વાયરલ કરી હોત તો બહું ફરક પડત. જેને પક્ષો સાથે જોડાવાનું છે તેઓ 18 પહેલા જોડાઇ જશે અને 18 તારીખ અમારી હશે. 

ભાજપ પર આકરા પ્રહાર કરતા હાર્દિક પટેલે કહ્યું કે જો ભાજપને ગુજરાતમાં 60થી વધારે એકપણ સીટ મળશે તો હું જેલ જવા તૈયાર છું. કારણ કે ભાજપને 60થી વધુ એક પણ બેઠક નથી મળવાની.