સુરતઃ વલસાડ જિલ્લાની તમામ 5 વિધાનસભા બેઠકો માટે આજે મતદાન યોજાશે. જિલ્લાની 5 બેઠકો પર ભાજપ કોંગ્રેસ સહિત કુલ 37 ઉમેદવારોના ભાવિ નો ફેઁસલો મતદાન દ્વારા થશે. મતદાનની તમામ તૈયારીઓને તંત્ર દ્વારા આખરી ઑપ આપી દેવામાં આવ્યો છે. વલસાડ જીલ્લાની કુલ 5 બેઠકોમાં 11 લાખ 61 હજાર 939 મતદારો નોંધાયા હતાં.
જેમાંથી 6 લાખ 76 પુરુષ મતદારો અને 5 લાખ 61 હજાર 863 સ્ત્રી મતદારો નોંધાયા હતાં. આમ આજે યોજાનાર મતદાન માટે જિલ્લાના 1356 બુથો ઉભા કરવામાં આવ્યા છે. મતદાન સમયે કોઈ અરાજકતા ન સર્જાય તે માટે સુરક્ષાકર્મીઓનો કાફલો પણ તૈનાત કરવામાં આવ્યો છે.
જિલ્લામાં 201 બુથો સંવેદનશીલ અને 73 બુથોને અતિસંવેદનશીલ જાહેર કરાયા છે. આથી આ બુથો પર વિશેષ સુરક્ષા બંદોબસ્ત ગોઠવાયો છે. તો લોકો સરળતાથી પોતાના મતાધિકારનો ઉપયોગ કરી શકે તે માટે મતદાન મથકો પર દિવ્યાઁગ મતદારો અને મહિલા મતદારો ને કોઇ અડચણ ન આવે એ માટેની પણ ખાસ વ્યવસ્થા જિલ્લા વહીવટી તંત્ર દ્વારા કરવામાં આવી છે.
ચાલુ વર્ષે કેટલાક બુથ માત્ર મહિલાઓ માટે જિલ્લા માં તૈયાર કરવામાં આવ્યા છે જેનું સંપૂર્ણ સંચાલન પણ મહિલાઓ કરનાર છે. તેમજ દિવ્યઅંગો માટે જિલ્લામાં 84 જેટલી વહીલચેર પણ રાખવામાં આવી છે. જેથી કોઈ દિવ્યઅંગ વ્યક્તિ જ્યારે મતદાન કરવા માટે આવે ત્યારે તેમને એક આસિસ્ટન્ટ પણ આપવામાં આવશે. જે જેતે વ્યક્તિને પોલિંગ બુથ સુધી લઈ જશે.