200 વર્ષ જુનો ઇતિહાસ ધરાવતી ગરબી જ્યાં માત્ર પુરૂષો જ ગરબે રમે છે

માં આધ્યાશક્તિ ની આરાધના નું પર્વ એટલે નવરાત્રી. વઢવાણ શહેરના વાઘેશ્વરી મંદિરના સાનિધ્યમાં અંદાજે 200 વર્ષ કરતા પણ જૂની એવી વાઘેશ્વરી ચોકની ગરબી બ્રાહમણની ગરબી તરીકે ઓળખાય છે. સમગ્ર ભારતમાં આ ગરબી આજે પણ વિશેષ મહત્વ ધરાવે છે. અહીં માત્ર પુરુષો અને યુવકો જ કોઈપણ જાતના ભેદભાવ વગર માં ના પ્રાચીન ગરબા ગાઇ છે. જયારે અહીં તિથિ પ્રમાણે અલગ-અલગ ગરબાઓ જેમ કે પ્રથમ નોરતે આરાસુરી બીજા નોરતે વાઘેશ્વરી માતા ત્રીજા નોરતે સહાય કરો આરાસુરી ચોથે નોરતે શંકર વિવાહ એમ અલગ-અલગ ગરબાઓ ના તાલે પુરુષો ગરબે રમે છે.

વઢવાણના રાજા પણ આ ગરબી જોવા આવતા હતા એવું કહેવાય છે. કોઈપણ જાતના ડેકોરેશન સાઉન્ડ વગર અહીં પુરુષો ગરબે રમે છે. જયારે ત્રણ-ત્રણ પેઢી એક સાથે ગરબે રમતા નજરે પડે છે અને આજની નવી પેઢી પણ ભારતીય સંસ્કૃતિને ઉજાગર કરતી આ ગરબીને વારસાગત રીતે શરુ રાખવા માંગે છે.

અહીં ગરબા રમતા-રમતા વૃધ્ધો પુરુષો અને યુવાનો એક તાલી ત્રણ તાલી દોઢિયુ પંચીયુ સહીત અલગ-અલગ સ્ટેપ અને લયમાં ઝૂમી ઉઠે છે. જ્યારે આઠમનો ગરબો સૌથી લાંબો ચાર કલાક સુધી ચાલે છે. માત્ર પુરુષો જ નહિ પરંતુ વૃધ્ધો પણ મન મુકીને ગરબે રમી માં ની આરાધના માં લીન થઇ જાય છે.આજના આધુનિક યુગમાં આજે પણ આ ગરબી ભારતની સંસ્કૃતિને ઉજાગર કરે છે.