ગાંધીનગર મહાનગરપાલિકાનું 282 કરોડનું ડ્રાફ્ટ બજેટ રજુ

ગાંધીનગર: મહાનગરપાલિકાનું રૂપિયા 282 કરોડનું ડ્રાફ્ટ બજેટ રજૂ કરાયું છે. મ્યુનિસિપલ કમિશ્નરે પાલિકાની સ્ટેન્ડિંગ કમિટી સમક્ષ બજેટ રજૂ કર્યું છે. આ બજેટના મુખ્ય મુદ્દાને જોઈએ તો પ્રોપર્ટી ટેક્સ અને વ્યવસાય વેરામાં કોઈ વધારો કરવામાં આવ્યો નથી. તો બાંધકામના વિસ્તાર પ્રમાણે બેઈઝ સફાઈ વેરાના અલગ અલગ સ્લેબ રાખવા માટે દરખાસ્ત મુકાઈ છે.

આ બજેટમાં સૌ પ્રથમવાર વાહન વેરાની દરખાસ્ત કરવામાં આવી છે. શહેરી વિસ્તારમાં સમાવીષ્ટ 6 ગામમાં આંતર માળખાકીય સુવિધા માટે રૂપિયા 4 કરોડની ફાળવણી કરવામાં આવી છે. શહેરમાં અકસ્માતને નિવારવા માટે ઓર્નામેન્ટલ ગ્રીલ લગાવવામાં આવશે. ઈન્ટિગ્રેટેડ કમાન્ડ એન્ડ કંટ્રોલ સેન્ટર ઉભુ કરવાની બજેટમાં જોગવાઈ કરવામાં આવી છે.

બજેટમાં 99 કરોડ 84 લાખની મહેસુલ આવકનો અંદાજ લગાવવામાં આવ્યો છે. જેમાં 77 કરોડ 53 લાખ મહેસૂલી ખર્ચની જોગવાઈ કરાઈ છે. આ સાથે વાહનો પર અલગ અલગ વાહન વેરા નાંખવાની જોગવાઈ કરાઈ છે. જેમાં 5થી 10 લાખ રૂપિયા સુધીના વાહનો પર બેઝિક પ્રાઈઝના 2.25 ટકા લેખે વાહન વેરો લેવાની જોગવાઈ કરાઈ છે.