ધ બર્નિગ ટ્રેન:પટના-મોકામા મેમૂ પેસેન્જરમાં આગ લાગતા એન્જિન સહિત 4 ડબ્બા ખાખ

બિહાર: પટના મોકામા મેમૂ ટ્રેનમાં મોડી રાત્રે આગ લાગી હતી.ટ્રેનના ચાર ડબ્બાઓમાં આગ લાગવાના કારણે નાચભાગ મચી ગઇ હતી.જો કે ટ્રેન મોકામા સ્ટેશનના પ્લેટફોર્મ નંબર 4 પર ઊભી હતી.અને તેમાં કોઇ પણ યાત્રી સવાર ન હતો.શરૂઆતમાં આગ ટ્રેનના એક ડબ્બામાં લાગી હતી.

પરંતુ આગ આગળ વધતા ચાર ડબ્બાઓ અને યૂનિટ એન્જિન સુધી પહોંચી ગઇ હતી.આગ લાગ્યા બાદ ઘણા સમય સુધી ફાયર બ્રિગેડ ઘટનાસ્થળે પહોચ્યું ન હતું.રેલના સૂત્રોના જણાવ્યા અનુસાર શોર્ટ સર્કિટને કારણે આગ લાગી હતી. ટ્રેનમાં આગ લાગવાની ઘટના બાદ સ્થાનિક રેલ મેનેજમેન્ટમાં દોડધામ મચી હતી. 

આ ઘટનાની જાણ થતાં જ રેલવે પોલીસ જીઆરપી અને સ્થાનિક પોલીસ ઘટના સ્થળે આવી પહોંચ્યા હતા. આગ પર કાબૂ મેળવવાનો પ્રયાસ કરવામાં આવી રહ્યો હતો પરંતુ સફળતા મળતી ન હતી.

ટ્રેનનું એન્જિન પણ બળી ગયું હોવાથી તેને અલગ કરવું સંભવ ન હતું. મોડી રાત્રે બે વાગ્યે પણ આગ પર કાબૂ મેળવી શકાયો ન હતો. મોડી રાત્રે ત્રણ વાગ્યે ફાયર બ્રિગેડનની બીજી ગાડીઓ મંગાવાઈ હતી.

ઉલ્લેખનીય છે કે મેમૂ ટ્રેનમાં આગ લાગવાને પગલે પ્લેટફોર્મ પર રહેલ યાત્રીઓએ દોડધામ કરી હતી. જોકે આગ બુઝવવાના કોઇ સાધનો સ્ટેશન પર ના હોવાને કારણે એક બોગીમાં લાગેલી આગ અન્ય બોગીમાં પણ ફેલાઇ હતી અને એન્જિન પણ બળીને ખાખ થઇ ગયું હતું. આ ઘટનામાં રેલવે તંત્રને લાખોનું નુકસાન થયુ છે.