ગાંધીનગરઃ વાવોલ ગામમાં એક ફલેટના પાર્કિગમાં આગ લાગી છે. આગમાં એક બાળક સહિત બે લોકોના મોત થયા છે. ફાયરની ટીમ દ્વારા આગ પર કાબુ મેળવાયો હતો. ઇજાગ્રસ્તોને અમદાવાદ સિવિલ હોસ્પિટલમાં ખસેડવામાં આવ્યા હતા.
ફલેટના પાર્કિંગમાં આજે વહેલી સવારે આગી ફાટી નીકળતા ચાર વર્ષના એક બાળક સહિત બેનાં મોત નીપજ્યા છે. પાર્કિંગમાં શોર્ટસર્કિટના કારણે ધૂમાડો ફલેટમાં ઉપરના માળે ફેલાતા ગુંગળાઇ જવાના કારણે બંનેનાં મોત નીપજ્યા હોવાનું ફાયરબ્રિગેડના સૂત્રોએ જણાવ્યું હતું. સેકટર-૭ પોલીસે આ અંગે અકસ્માતે મોત નોંધી તપાસ હાથ ધરી છે.
મળતી માહિતી મુજબ પાર્કિંગમાં આગના કારણે ધૂમાડો ફલેટમાં પહોંચ્યો હતો જેમાં પહેલા માળે રહેતા કહાર પિંજારા (ઉ.વ.૪) અને બીજા માળે રહેતી ૩પ વર્ષીય મહિલાનું ગુંગળાઇ જવાના કારણે મોત થયું હતું.
આ ઘટનાની જાણ ફાયરબ્રિગેડને થતા કાફલો ઘટનાસ્થળે દોડી ગયો હતો. ફાયરબ્રિગેડના જવાનોએ આગ બુઝાવી ૧પ જેટલા વ્યક્તિઓને સહીસલામત ફલેટમાંથી બહાર કાઢ્યા હતા. આ ઘટનામાં અન્ય પાંચ વ્યક્તિઓ પણ દાઝી જતા સારવાર માટે અમદાવાદ સિવિલ હોસ્પિટલમાં ખસેડાયા હતા.